Qaraǵandyda asyrap alǵan jetim balalardy qorlaǵan otbasy sottalyp jatyr, - dep habarlaidy Dalanews.kz.
"KTK" arnasy málimetinshe, Qaraǵandyda jetimder úiinen 6 bala asyrap alyp, "qyzyn kúń, ulyn qul qylǵan" otbasy sotqa tartylyp jatyr. Tergeý málimetinshe, asyrandy balalar ata-ana meiiriminiń ornyna qorlyq kórgen.
"Tamaq bermei, únemi uryp-soǵyp, aqyry bireýin múgedek qylǵan. Otbasynyń úsh múshesine qatysty azaptaý baby boiynsha aiyp taǵyldy", - dep jazylǵan málimette.
Qarqaraly aýdanyna qarasty aýyldardyń birinde bul otbasy 2018 jyly otbasy tipindegi balalar úiin ashqan. Patranat tárbiege balalar úiinen alty jetkinshekti alady.
"Olardy birden malǵa salyp, qora‑qopsysyn qaratyp, qara jumysqa jekken. Qit etse, kókala qoidai etip sabap, nár tatyrmai qoiady eken. Prokýror balalardyń botqasyna "maldyń tezegin qosyp bergen" degen derekterdi jetkizdi. Tipti olar dalada, ittiń úishiginde túnegen kezi de bolǵan. Sarapshylar únemi taiaq jep kelgen balalardyń denesinen 19-dan 47-ge deiin tyrtyq anyqtaǵan. Eń kishisiniń tipti basyn jaryp tastapty.
Aýdannyń qorǵanysh bólimi qaida qaraǵany túsiniksiz. Al alty balanyń tárbiesine ai saiyn tólenetin 300 myń teńgeni qysylmai alyp kelgen. Qazir úsh bala týǵan ájesiniń qaraýyna berilgen. Qalǵan úsheýi balalar úiine qaitarylyp, quldyqtan qutyldy", - dep jazylǵan arna dereginde.
"Balalarǵa kúnde qol jumsap otyrǵan. Túkke turmaityn qylyǵyna bola qamshymen sabap, kóseýmen ońdyrmai uryp kelgen. Sonyń saldarynan balalardyń basy, beti, qol-aiaǵy tolǵan tyrtyq. Durys tamaqtanbaǵandyqtan, qatarlastaryna sai damyp óspegen", - dedi prokýror Ádil Sadyqov.
