Atalǵan forým Elbasy Nursultan Nazarbaevtyń «El Úmiti» jáne «Qamqorshylyq» bastamalarynyń aıasynda uıymdastyryldy. Jıynǵa oblystyq bilim berý basqarmasynyń ókilderi, oqýshylar men ata-analar qatysty.
Baqytgúl Hamenova «Myń bala» Ulttyq olımpıadasy men «Elbasy medali» jobasynyń mańyzdylyǵyn atap ótti.
– Shynaıy patrıotızm – barlyq jeke múddelerden joǵary turatyn, adam rýhynyń asqar shyńy. Naǵyz otanshyldyqtyń basty ólshemi de árbir qazaqstandyqtyń eli men halqy aldyndaǵy paryzyn tereń túsinýinde. Bul jobalardyń maqsaty da – jas urpaqtyń rýhanı-adamı qasıetin qalyptastyryp, patrıottyq tárbıe berýde Otanǵa degen súıispenshilik sezimi men qoǵam damýyndaǵy urpaqtar sabaqtastyǵynyń mańyzdylyǵyn kórsetý, – dedi oblys ákiminiń orynbasary Baqytgúl Hamenova.
Shara barysynda joba júldegerleri arnaıy syılyqtarmen marapattaldy. Aıtalyq, «Myń bala» jobasynyń júldegerlerine Nursultan Nazarbaev Qorynyń atynan dıplom men noýtbýk tabys etilip, «Elbasy Medali» jobasyna qatysqan oqýshylar Nursultan Nazarbaev qorynyń qola deńgeıindegi medaldarymen marapattaldy.
«Elbasy medaliniń» qola deńgeıindegi medalimen marapattalǵan N.Tilendıev atyndaǵy Kishi óner akademıasynyń 10 synyp oqýshysy Márıam Qojabalýanova jobadan alǵan áserimen bólisti.
– Elbasynyń bastaýymen iske asyrylyp otyrǵan jobanyń qatysýshylary úshin bul – tarıhı sát. Osy oraıda, Elbasymyzǵa, jobanyń barlyq uıymdastyrýshylaryna, tálimgerlerimizge aıtar alǵysym sheksiz. Bizdiń damýymyzǵa, jańa daǵdylar alýymyzǵa, kesheden góri jaqsy bolýymyzǵa atsalysyp, zor úlesin qosyp keledi. Áli talaı belester, alǵa qoıǵan maqsattar bar. «Elbasy medaliniń» altyn medaline jetkenshe bolashaq ómirimizge paıdaly baǵdar, úlken tájirıbe jınaımyz, – deıdi Márıam Qojabalýanova.
