Memlekettik keńesshi Erlan Qarinniń tóraǵalyǵymen Shetelde kadrlar daiarlaý jónindegi respýblikalyq komissiianyń kezekti otyrysy ótti, dep habarlaidy Dalanews.kz.
Biyl "Bolashaq" halyqaralyq stipendiiasyna úmitkerler sany arta tústi.
"Jalpy konkýrs nátijesine sáikes barlyq baǵdarlama men baǵyt boiynsha bir orynǵa tórt adamnan keldi. Aita ketý kerek, bul – "Bolashaq" stipendiiasynyń jańa erejelerge sai ótkizilgen ekinshi baiqaýy. Úmitkerler testileý, áńgimelesý jáne Respýblikalyq komissiia otyrysynda baǵalaý sekildi úsh kezeńnen turatyn irikteýden ótti", delingen habarlamada.
Osy joly 981 úmitker stipendiiaǵa ótinim bergen. Olardyń birinshi kezeńnen 916-y, ekinshi kezeńnen 659-y, úshinshi kezeńnen 217-i ótti.
Jiyn barysynda 217 azamatqa "Bolashaq" halyqaralyq stipendiiasyn taǵaiyndaý týraly sheshim qabyldandy. Onyń ishinde 167-i – magistratýrada, 13-i doktorantýrada oqidy. Sondai-aq 37 azamat álemniń eń úzdik ýniversitetteri men ortalyqtarynda kásibi taǵylymdamadan ótedi.
Komissiia músheleri basymdyq berilip otyrǵan mamandyqtarǵa erekshe nazar aýdardy. Iaǵni stipendiia iegerleriniń 67,7 paiyzy – jaratylystaný-tehnikalyq, al 32,3 paiyzy áleýmettik-gýmanitarlyq baǵyttar boiynsha bilimin jetildiredi.
Sondai-aq Respýblikalyq komissiia ǵylymi taǵylymdamadan ótýge qatysty konkýrstyq irikteý nátijelerin qarastyrdy. Oǵan 165 adam ótinish bildirgen. Úsh kezeńnen turatyn konkýrstyq irikteý nátijesinde 68 azamatqa álemdegi jetekshi ǵylymi jáne zertteý ortalyqtarynda taǵylymdamadan ótýge stipendiia taǵaiyndaldy.
Otyrys qorytyndysy boiynsha Memlekettik keńesshi Erlan Qarin "Bolashaq" halyqaralyq stipendiiasyn odan ári júzege asyrý jáne jetildirý jóninde naqty tapsyrmalar berdi.
Bolashaq stipendiiasy igerleriniń tizimi taiaý kúnderi "Halyqaralyq baǵdarlamalar ortalyǵy" AQ resmi saitynda jáne áleýmettik jelidegi paraqshalarynda jariialanady.
Buǵan deiin 2025-2026 oqý jylyna arnalǵan memlekettik bilim berý granttary iegerleriniń tizimi jariialanǵan bolatyn.
