بيىل "بولاشاق" حالىقارالىق ستيپەندياسىنا ۇمىتكەرلەر سانى ارتا ءتۇستى.
"جالپى كونكۋرس ناتيجەسىنە سايكەس بارلىق باعدارلاما مەن باعىت بويىنشا ءبىر ورىنعا ءتورت ادامنان كەلدى. ايتا كەتۋ كەرەك، بۇل – "بولاشاق" ستيپەندياسىنىڭ جاڭا ەرەجەلەرگە ساي وتكىزىلگەن ەكىنشى بايقاۋى. ۇمىتكەرلەر تەستىلەۋ، اڭگىمەلەسۋ جانە رەسپۋبليكالىق كوميسسيا وتىرىسىندا باعالاۋ سەكىلدى ءۇش كەزەڭنەن تۇراتىن ىرىكتەۋدەن ءوتتى"، دەلىنگەن حابارلامادا.
وسى جولى 981 ۇمىتكەر ستيپەندياعا ءوتىنىم بەرگەن. ولاردىڭ ءبىرىنشى كەزەڭنەن 916-ى، ەكىنشى كەزەڭنەن 659-ى، ءۇشىنشى كەزەڭنەن 217ء-ى ءوتتى.
جيىن بارىسىندا 217 ازاماتقا "بولاشاق" حالىقارالىق ستيپەندياسىن تاعايىنداۋ تۋرالى شەشىم قابىلداندى. ونىڭ ىشىندە 167ء-ى – ماگيستراتۋرادا، 13ء-ى دوكتورانتۋرادا وقيدى. سونداي-اق 37 ازامات الەمنىڭ ەڭ ۇزدىك ۋنيۆەرسيتەتتەرى مەن ورتالىقتارىندا كاسىبي تاعىلىمدامادان وتەدى.
كوميسسيا مۇشەلەرى باسىمدىق بەرىلىپ وتىرعان ماماندىقتارعا ەرەكشە نازار اۋداردى. ياعني ستيپەنديا يەگەرلەرىنىڭ 67،7 پايىزى – جاراتىلىستانۋ-تەحنيكالىق، ال 32،3 پايىزى الەۋمەتتىك-گۋمانيتارلىق باعىتتار بويىنشا ءبىلىمىن جەتىلدىرەدى.
سونداي-اق رەسپۋبليكالىق كوميسسيا عىلىمي تاعىلىمدامادان وتۋگە قاتىستى كونكۋرستىق ىرىكتەۋ ناتيجەلەرىن قاراستىردى. وعان 165 ادام ءوتىنىش بىلدىرگەن. ءۇش كەزەڭنەن تۇراتىن كونكۋرستىق ىرىكتەۋ ناتيجەسىندە 68 ازاماتقا الەمدەگى جەتەكشى عىلىمي جانە زەرتتەۋ ورتالىقتارىندا تاعىلىمدامادان وتۋگە ستيپەنديا تاعايىندالدى.
وتىرىس قورىتىندىسى بويىنشا مەملەكەتتىك كەڭەسشى ەرلان قارين "بولاشاق" حالىقارالىق ستيپەندياسىن ودان ءارى جۇزەگە اسىرۋ جانە جەتىلدىرۋ جونىندە ناقتى تاپسىرمالار بەردى.
بولاشاق ستيپەندياسى يگەرلەرىنىڭ ءتىزىمى تاياۋ كۇندەرى "حالىقارالىق باعدارلامالار ورتالىعى" اق رەسمي سايتىندا جانە الەۋمەتتىك جەلىدەگى پاراقشالارىندا جاريالانادى.
بۇعان دەيىن 2025-2026 وقۋ جىلىنا ارنالعان مەملەكەتتىك ءبىلىم بەرۋ گرانتتارى يەگەرلەرىنىڭ ءتىزىمى جاريالانعان بولاتىن.
