Biylǵy 10 aida Qazaqstanǵa QHR-dan 122 myńnan astam týrist kelgen. Bul - 2023 jylmen salystyrǵanda 64% kóp kólem, dep habarlaidy Dalanews.kz.
Týrizm indýstriiasy komiteti (TIK) baspasóz qyzmetiniń málimetinshe, Qytai Qazaqstan úshin negizgi týristik maqsatty naryqtardyń biri sanalady. Byltyr qarashada Qazaqstan men Qytai azamattary úshin 30 kúntizbelik kúnge deiin ózara vizasyz rejim engizilse, biyldan bastap Qazaqstan men Qytai arasyndaǵy reister sany artty. Qazirgi tańda Qazaqstan – Qytai baǵyty boiynsha aptasyna 44 reis oryndalady.
eQonaq júiesiniń derekteri boiynsha, biylǵy 10 aida Qazaqstanǵa QHR-dan 122 myńnan astam týrist kelgen. Bul 2023 jylmen salystyrǵanda 64% kóp. Byltyrǵy 10 aida elimizde 78 515 qytailyq týrist saiahattaǵan.
TIK málimetinshe, búginderi Qazaqstan Beijińdegi halyqaralyq China Outbound Travel & Tourism týristik kórmesine qatysyp jatyr. Kórmedegi Qazaqstan stendi QR Týrizm jáne sport ministrliginiń tapsyrysy boiynsha Kazakh Tourism UK AQ jáne Almaty oblysy Týrizm basqarmasy Qazaqstannyń QHR-daǵy elshiliginiń qoldaýymen uiymdastyrýda.
"Ulttyq stendte Qazaqstannyń týrizm áleýetin 21 týristik sala ókili tanystyrady. Olardyń qatarynda 12 týroperator, 7 qonaq úi jáne demalys oryndary bar. Qazaqstan áleýeti zor týristik baǵyt retinde halyqaralyq tanymaldylyqqa ie bolyp keledi. Elimizdiń týristik múmkindikteri China Media Group, Dragon Trail jáne basqa da jetekshi halyqaralyq platformalarda jahandyq aýditoriianyń nazaryn aýdarýda", delingen resmi habarlamada.
Kórme aiasynda Outbound Tourism Investment & Development Forum is-sharasynda Qazaqstannyń investitsiialyq áleýetin tanystyrý josparlanǵan.
