Túrkistan oblysynda eldi mekenderdi infraqurylymmen qamtý kriteriileri jasaldy. Eń aldymen múldem sý, gaz qubyry joq aýyldardyń máselesin sheshýge basymdyq beriledi. Sonymen birge sý kózderin barlaý jumystary nazarǵa alynady. Turǵyn úi-kommýnaldyq sharýashylyq máselelerin retteý jónindegi jinalysta oblys ákimi Darhan Satybaldy jaýaptylarǵa naqty tapsyrmalar berdi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Josparsyz ázirlengen jobalar kóp. Birqatarynyń jobalyq-smetalyq qujattary eskirgen. Qarjy kólemi ózgergen. Olardy basynan saraptap, naqty eldiń infraqurylym máselesin sheshetinderin júzege asyrý kerek. Qaitadan eseptep shyǵyńyzdar. Aýyz sýmen, gazben, elektr jaryǵymen qamtýda sapaly jospar qajet. Bir aýylǵa gaz nemese sý kelip, kórshi aýylǵa barmai turmaýy tiis. Jumysty tyńǵylyqty júielep, jobalyq-smetalyq qujatty sapaly daiyndaǵannan keiin ǵana jobany iske asyryńyzdar, – dedi Darhan Satybaldy.
Túrkistan oblysynyń energetika jáne turǵyn úi-kommýnaldyq sharýashylyq basqarmasynyń basshysy Rýslan Muzdybekov infraqurylymdy jetildirý jumystaryn júrgizýge negiz bolatyn sharttardy aitty. Aýyz sý júiesine toqtalsaq, eldi mekende aýyz sý júiesiniń bolmaýy, bekitilgen sý qorynyń bolýy, obektilerdiń (júielerdiń) tozýynyń naqty joǵary dárejesi (keminde 50 %), eldi mekendegi tutynýshylar sany, aýyldyq eldi mekenderde sý júiesin salý boiynsha halyqtyń kelisý hattamasynyń bolýy, qurylys qunynyń qoldanystaǵy normalar men erejelerge sai bolýy nazarǵa alynady.
Al gaz nysanyn salar aldynda gaz taratý stantsiiasynyń qajetti qýattylyǵyn anyqtaý, stantsiiaǵa qosylatyn eldi mekenderdiń, áleýmettik jáne óndiristik nysandardyń perspektivalyq ósimin eskere otyryp, qajettiligin esepteý jáne ózge de túitkilder zertteledi. Elektrmen qamtý kezinde de jobalar ábden zerdelenip, eń ózekti, ótkir máseleler sheshiledi. Turǵyndardyń talap-tilekteri eskeriledi.
Jiynda jobalyq-smetalyq qujaty durys jasalmaǵan jobalar, saraptamadan ótý talaptary saqtalmaǵan nysandar, júieli qatelikter de sóz bolyp, aýdan, qala ákimderi men jaýapty basqarmaǵa tiisti tapsyrmalar berildi.
Aita keteiik, Túrkistan oblysynda 832 eldi mekenniń 739-y aýyz sýmen qamtylǵan. Aýyz sý jelileriniń uzyndyǵy 15 myń shaqyrymǵa jýyqtaǵan. Óńirde 12 myń shaqyrymǵa jýyq tabiǵi gaz júiesi bolsa, elektr jelileriniń uzyndyǵy 20700 shaqyrymnan asady. Oblysta jańadan sý, gaz, elektr jelilerin tartý jáne tozǵan jelilerdi jóndeý jumystary jalǵasady. Aýyz sý boiynsha 3 jylda 202 joba júzege asyrylyp, turǵyndardyń aýyz sý salasyna qatysty máselesi sheshimin tabady nemese jaǵdaiy jaqsarady. Tabiǵi gaz salasynda – 237, elektr salasynda 130 joba júzege asady dep josparlanyp otyr. Jalpy 569 joba iske asyrylady dep mejelengen.
