Eńbek jáne halyqty áleýmettik qorǵaý mınıstrliginiń deregine sáıkes, 1991 jyldan beri tarıhı otanyna oralǵan etnıkalyq qazaqtardyń sany 1 mıllıon 164 myń 800 adamǵa jetken, dep habarlaıdy Dalanews.kz.

2025 jyly qandas mártebesin alǵan azamattardyń basym bóligi Ózbekstan men Qytaıdan kelgen. Atap aıtqanda, olardyń 44,5 paıyzy – Ózbekstannan, 44,1 paıyzy – Qytaıdan qonys aýdarǵan. Sonymen qatar Túrikmenstannan kelgender – 4%, Mońǵolıadan – 3%, Reseıden – 2,5%.

2026 jyldyń basyndaǵy málimet boıynsha, qandastardyń 57,4 paıyzy eńbekke jaramdy jasta bolsa, 34 paıyzy – kámeletke tolmaǵandar. Al 8,6 paıyzy zeınet jasyndaǵy azamattar sanalady.

Elge kóship kelgender negizinen jumys kúshi tapshy aımaqtarǵa baǵyttalǵan. Olardyń qatarynda Aqmola, Abaı, Qostanaı, Pavlodar, Atyraý, Batys Qazaqstan, Shyǵys Qazaqstan jáne Soltústik Qazaqstan oblystary bar. Ótken jyly atalǵan óńirlerge 2 309 adam qonystandyrylyp, belgilengen kóshi-qon kvotasy tolyq oryndaldy.

Aıta keteıik, ár túrli elderde, negizinen kórshiles memleketterde (Qytaı, Ózbekstan, Reseı, Monǵolıa jáne basqa elderde) etnıkalyq qazaqtar turady.

Resmı kórsetkishter boıynsha shetelde shamamen 3,5 mıllıonnan astam qazaq turady, al keıbir sarapshylar bul sandy 5–7 mıllıonǵa deıingi aralyqqa baǵalaıdy.

Negizgi elder boıynsha etnıkalyq qazaqtar sany (boljam boıynsha):

Qytaı - shamamen 1,6 mıllıon qazaq

Ózbekstan - shamamen 821 myń qazaq

Reseı - shamamen 591 myń qazaq

Mońǵolıa - shamamen 121 myń qazaq

Qyrǵyzstan - shamamen 35 myń qazaq

Túrkıa - shamamen 30 myń qazaq

AQSH - shamamen 17 myń qazaq

Iran - shamamen 10 myń qazaq

Túrikmenstan - shamamen 9 myń qazaq bar.