ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنە سايكەس، 1991 جىلدان بەرى تاريحي وتانىنا ورالعان ەتنيكالىق قازاقتاردىڭ سانى 1 ميلليون 164 مىڭ 800 ادامعا جەتكەن، دەپ حابارلايدى Dalanews.kz.

2025 جىلى قانداس مارتەبەسىن العان ازاماتتاردىڭ باسىم بولىگى وزبەكستان مەن قىتايدان كەلگەن. اتاپ ايتقاندا، ولاردىڭ 44،5 پايىزى – وزبەكستاننان، 44،1 پايىزى – قىتايدان قونىس اۋدارعان. سونىمەن قاتار تۇرىكمەنستاننان كەلگەندەر – 4%، موڭعوليادان – 3%، رەسەيدەن – 2،5%.

2026 جىلدىڭ باسىنداعى مالىمەت بويىنشا، قانداستاردىڭ 57،4 پايىزى ەڭبەككە جارامدى جاستا بولسا، 34 پايىزى – كامەلەتكە تولماعاندار. ال 8،6 پايىزى زەينەت جاسىنداعى ازاماتتار سانالادى.

ەلگە كوشىپ كەلگەندەر نەگىزىنەن جۇمىس كۇشى تاپشى ايماقتارعا باعىتتالعان. ولاردىڭ قاتارىندا اقمولا، اباي، قوستاناي، پاۆلودار، اتىراۋ، باتىس قازاقستان، شىعىس قازاقستان جانە سولتۇستىك قازاقستان وبلىستارى بار. وتكەن جىلى اتالعان وڭىرلەرگە 2 309 ادام قونىستاندىرىلىپ، بەلگىلەنگەن كوشى-قون كۆوتاسى تولىق ورىندالدى.

ايتا كەتەيىك، ءار ءتۇرلى ەلدەردە، نەگىزىنەن كورشىلەس مەملەكەتتەردە (جۇڭگو، وزبەكستان، رەسەي، مونعوليا جانە باسقا ەلدەردە) ەتنيكالىق قازاقتار تۇرادى.

رەسمي كورسەتكىشتەر بويىنشا شەتەلدە شامامەن 3،5 ميلليوننان استام قازاق تۇرادى، ال كەيبىر ساراپشىلار بۇل ساندى 5–7 ميلليونعا دەيىنگى ارالىققا باعالايدى.

نەگىزگى ەلدەر بويىنشا ەتنيكالىق قازاقتار سانى (بولجام بويىنشا):

جۇڭگو - شامامەن 1،6 ميلليون قازاق

وزبەكستان - شامامەن 821 مىڭ قازاق

رەسەي - شامامەن 591 مىڭ قازاق

موڭعوليا - شامامەن 121 مىڭ قازاق

قىرعىزستان - شامامەن 35 مىڭ قازاق

تۇركيا - شامامەن 30 مىڭ قازاق

اقش - شامامەن 17 مىڭ قازاق

يران - شامامەن 10 مىڭ قازاق

تۇرىكمەنستان - شامامەن 9 مىڭ قازاق بار.