Jiynǵa «Nur Otan» partiiasynyń Túrkistan oblystyq filialy tóraǵasynyń birinshi orynbasary N.Joldasov, oblystyq bilim basqarmasynyń jáne qalalyq, aýdandyq bilim bólimderiniń basshylary, qala, aýdan ákimderiniń bilim salasyna jetekshilik etetin orynbasarlary men oblystaǵy barlyq bilim berý uiymdarynyń 1300 basshylary, sondai-aq, arnaiy monitoringtik top músheleri qatysty.
Is sharanyń maqsaty – bilim salasyndaǵy sybailas jemqorlyq deńgeiin tómendetý, ata-analardan, oqytýshylardan zańsyz aqsha jinaýdy toqtatý máselelerin keńinen talqylaý.
Otyrysqa tóraǵalyq etken oblys ákiminiń orynbasary U.Sádibekov oblysta bilim berý salasy sybailas jemqorlyq táýekelderi joǵary sala ekeni Elbasy tarapynan synǵa ilingenin, bilim berý salasy jemqorlyq kórinisteri joǵary deńgeige jetip otyrǵanyn aityp, bilim berý uiymdarynyń basshylaryna jemqorlyq táýekelderin tómendetý baǵytynda naqty sharalar qabyldaýdy tapsyrdy.
Óz baiandamasynyń sońynda bilim berý salasynda ashyqtyqty qamtamasyz etý jáne sybailas jemqorlyq deńgeiin tómendetý baǵytynda birqatar naqty usynystar engizdi.
Atap aitqanda, ortalyqtandyrylǵan qarjylandyrý júielerin engizý, muǵalimderdi jumysqa qabyldaýdy mektep direktorlarynyń quzyrynan alyp, bul jumyspen tikelei eń aldymen qoǵam múshelerinen engizilgen konkýrstyq komissiia múshelerine berý, muǵalim laýazymy úmitkerleri úshin testileý baǵdarlamasyn ázirleý, tehnikalyq qyzmetkerlerdi jumysqa qabyldaýdy aýtsorsingke berý.
Sondai-aq, bilim berý uiymdaryna memlekettik tarapynan bólinetin qarajattar týraly aqparatty bilim berý uiymdarynyń barshaǵa kórinetin jerlerine ornalastyrýdy.
Májiliste «Nur Otan» partiiasynyń oblystyq filialy tóraǵasynyń birinshi orynbasary N.M.Joldasov, oblystyq bilim basqarmasynyń basshysy I.Ó.Saǵyndyqov taqyryptyq baǵytta baiandama jasady.
Buǵan qosa, Nazarbaev ziiatkerlik mektebiniń direktory B.M.Qasymov muǵalimderdi jumysqa jáne oqýshylardy mektepke qabyldaýdaǵy ashyqtyqty qamtamasyz etý boiynsha óz mektebindegi tájribemen bólisti.
Jiynda Ulttyq biýro Departamenti basshysynyń orynbasary Á.Jorabekov osy salada oryn alǵan qylmystar týraly baiandama jasap, sońynan ustalǵan mektep direktorlaryna qatysty video túsirilimder kórsetti.
Jiyn sońynda U.Sádibekov qatysýshylarǵa búgingi kezdesýden qorytyndy shyǵarýdy, kún tártibinde qaralǵan basty másele sybailas jemqorlyq táýekelderin tóendetý baǵytynda naqty sharalar qabyldaýdy tapsyrdy.
