Osydan birneshe jyl buryn «Jetisý» telearnasyn basqarǵan belgili telejýrnalist Beisen Quranbek radio ashý týraly bastama kótergen bolatyn. Bul isti onyń áriptesteri Serik Sarybai, Dosan Qyzaibekovter sońyna jetkizip, búgin «Jetisý» radiosynyń resmi ashylýyn ótkizdi.
Saltanatty jiynda quttyqtaý tilegin bildirgen oblystyq ishki saiasat basqarmasynyń basshysy Bolat Kerimbek:
– Qazirgi kezde shynaiy aqparat taratý, ideologiialyq baǵytty nyǵaitý – basty nazarda. Bul rette «Jetisý» radiosynyń qosatyn úlesi zor bolady dep oilaimyn. Biz óz tarapymyzdan árdaiym qoldaý kórsetemiz. Jańa ujymǵa tabysty jumys tileimin, – dedi ol.
«Taldyqorǵannan sóilep turmyz», - dep áýe tolqynyna shyqqan radio saltanatty ashylý rásimin tolyqtai tikelei efirde berdi.
«Jetisý» telearnasy direktorynyń orynbasary Daniiar Seisenbaevtyń aitýynsha, arnaǵa tyńdarman táýlik boiyna ár óńirde ártúrli jiilikte qosyla alady. Máselen, Taldyqorǵan qalasynda – 107.2, Jarkent – 106.5, Tekeli – 104.8, Úsharal – 104.3, Lepsi –103.8, Balqash aýdany, Balatopar eldimkeninde -102.1, Quiǵan – 101.7, Raiymbek aýdanyndaǵy Qyzylush, Jalańash aýyldarynda 100 jiiliginen efirge shyǵady. Bolashaqta «Jetisý» radiosynyń tolqyny oblystyń barlyq aýmaǵyna taralady. Qazir osy baǵytta tehnikalyq jáne qujattandyrý jumysy júrgizilip jatyr.
Radio aqparattyq-tanymdyq baǵytta jumys isteidi. Ujymǵa belgili qalamger Esbolat Aidabosyn jetekshilik etedi. Munda salanyń qyr-syryn meńgergen Ainur Tóleý, Muhit Toqtasyn, Saltanat Jeksembek, Arshyn Aidynbekuly syndy redaktorlar eńbek etedi. Mýzykalyq árleý, qadaǵalaý Maqsat Arystanbaev pen dybys rejisseri Safa Serǵazynyń moinynda. Shyǵarmashylyq quram aldaǵy ýaqytta taǵy da jańa mamandarmen tolyǵa túspek.
