Beijińde "Jahandyq ózgerister dáýirindegi Eýraziiadaǵy jańa investitsiialyq múmkindikter" taqyrybyna orailastyrylǵan XIV halyqaralyq sheteldik investitsiia jármeńkesi jumysyn aiaqtady. Is-sharany Qytaidyń sheteldik damý qaýymdastyǵy uiymdastyrdy, dep habarlaidy Dalanews.kz.
Halyqaralyq is-sharaǵa qazaqstandyq delegatsiiany "Atameken" UKP basqarma tóraǵasy Raiymbek Batalov bastap bardy. Delagatsiia QHR jáne birqatar shet eldiń biznes ókilderimen investitsiialyq forým jumysyna qatysty.
Jármeńkege Qytai sheteldik damý qaýymdastyǵynyń prezidenti He Chjenvei, Qazaqstan Respýblikasynyń Qytaidaǵy tótenshe jáne ókiletti elshisi Shahrat Nuryshev, Qazaqstannyń syrtqy saýda palatasynyń tóraǵasy Murat Qarymsaqov, qazaqstandyq kompaniialar, iskerlik qaýymdastyqtar men investitsiialyq qorlardyń basshylary qatysty. Is-sharaǵa 96 elden qytailyq jáne sheteldik biznestiń 2200-den astam ókili, sondai-aq 23 eldiń elshileri men 196 diplomat qatysty.
Is-shara memleketter arasyndaǵy investitsiialyq yntymaqtastyqty tereńdetip, keńeitýge járdemdesedi, ekijaqty investitsiialyq kelisimderdi iske asyrýǵa, sondai-aq Halyqaralyq ekonomikalyq jáne saýda múmkindikterin izdeýge yqpal etedi.
Qazaqstannyń syrtqy saýda palatasynyń tóraǵasy Murat Qarymsaqov shet elderge investitsiialaý múmkindikterimen tanysýǵa kómektesetin mundai aýqymdy is-shara jyl saiyn ótip turatynyn atap ótti. Biyl Qazaqstan men Ortalyq Aziia elderi osy konferentsiianyń qurmetti qonaqtarynyń qatarynda boldy.
"Biz elimizdiń investitsiialyq jobalary men múmkindikterin kórsetý úshin Qytaidyń iri investitsiialyq qorlary men kompaniialarynyń ókilderimen birqatar kezdesý ótkizdik. Osy kezdesýlerde ekonomikanyń túrli sektorlary men Qazaqstan óńirlerine investitsiialaý boiynsha ózekti aqparatty usyndyq. Forým alańdarynda Qytaidyń eń iri HENAN ZHENGZHOU MINING MACHINERY CO. LTD kompaniiasyna múmkindik Ońtústik Qazaqstan oblysyndaǵy Túlkibas ák zaýytyn jańǵyrtýǵa investitsiia salýǵa múmkindik beretin kelisimge qol qoiyldy", - dedi Murat Qarymsaqov.
Qazirgi kezde Qazaqstanda CNPC, CITIC, NFC, SINOPEC, HUAWEI jáne basqa da iri korporatsiialardy qosa alǵanda, qytai kapitaly bar 2300-den astam kompaniia tabysty jumys istep jatqanyn atap ótken jón.
Qazaqstan men Qytai arasyndaǵy júk tasymalynyń kólemi 2023 jyly 22%-ǵa ósti. Bul úderis eki el arasyndaǵy ekonomikalyq bailanystardyń damýy men nyǵaiýyn aiǵaqtaidy. Is-shara "Bir beldeý, bir jol" bastamasy aiasynda yntymaqtastyqty keńeitýde de mańyzdy ról atqardy.
