Qostanai oblysynda alǵash ret ótken Allur Endurance CUP 2026 halyqaralyq tózimdilikke arnalǵan at sporty týrnirine bes elden 36 shabandoz qatysyp, jeti júldeli orynnyń barlyǵyn qazaqstandyq sportshylar jeńip aldy. Bas júlde retinde Qostanaidaǵy Allur zaýytynda shyǵarylǵan Chevrolet Cobalt avtokóligi tabystaldy, dep habarlaidy dalanews.kz.
Ǵasyrlar boiy jylqy ulttyq mádeniettiń ajyramas bóligine ainalǵan Qazaqstan búginde zamanaýi at sportynyń damýyna jańa múmkindikter ashyp otyr. Sonyń jarqyn úlgisi – Respýblika kúni qarsańynda qazaqstandyq Allur avtomobil kompaniiasynyń qoldaýymen ótken Allur Endurance CUP 2026 halyqaralyq týrniri.
Jarysqa Qazaqstan, Vengriia, Siriia, Ulybritaniia jáne Malaiziia ókilderi qatysty. Sportshylar FEI halyqaralyq standarttaryna sáikes keletin CEI 1* sanatyndaǵy 100 shaqyrymdyq qashyqtyqty baǵyndyrdy. Jarystyń ótý barysyn Birikken Arab Ámirlikterinen kelgen tóreshiler qadaǵalady.
Tózimdilikke arnalǵan at jarysy – jyldamdyq jeńistiń jalǵyz sharty bolyp sanalmaityn erekshe sport túri. Shabandozǵa búkil qashyqtyq boiyndaǵy kúshti durys bólý, jylqynyń jai-kúiin seziný jáne onyń jaǵdaiyn turaqty baqylaý qajet. Dál osy qasietter qazaqtyń atqa miný mádenieti men shabandozdyq mektebin tarihi turǵydan erekshelendirip keledi.
Allur kompaniiasy úshin mundai jarystardy qoldaý – otandyq jylqy sharýashylyǵyn damytý, at sportyn keńinen nasihattaý jáne ulttyq murany saqtaý baǵytyndaǵy júieli jumystyń bir bóligi. Kompaniia jekelegen sporttyq is-sharalardy qoldaýmen ǵana shektelmei, qazaqstandyq shabandozdar men elimizde ósiriletin jylqy tuqymdarynyń halyqaralyq arenada óz múmkindikterin senimdi kórsetýine jaǵdai jasaýǵa umtylady.
«Qazaqstan úshin jylqy – tarihymyzdyń bir bóligi ǵana emes. Ol – saqtap qana qoimai, damytýdyń da mańyzy zor ulttyq bailyǵymyz. Bizdiń ózimizge tán biregei jylqy tuqymdarymyz, talantty sportshylarymyz jáne ǵasyrlar boiy qalyptasqan dástúrlerimiz bar. Bizdiń mindetimiz – osy murany zamanaýi halyqaralyq standarttarmen ushtastyrý. Sondyqtan Allur at sportyn qoldaýdy uzaq merzimdi jumys retinde qarastyrady. Qazaqstannyń álemge tek bai at sporty dástúrleriniń otany retinde ǵana emes, myqty sportshylary men damyǵan jylqy sharýashylyǵy bar el retinde de tanylǵanyn qalaimyz», – dedi Allur zaýytynyń atqarýshy direktory Arǵulan Maiqonov.
Týrnir Qostanai jáne adai jylqy tuqymdaryn damytý turǵysynan da erekshe mańyzǵa ie. Halyqaralyq jarystar olardyń tózimdiligin kórsetýge, otandyq jylqy ósirýshilerdiń múmkindikterin keńeitýge, sondai-aq sportshylardyń sheteldik jarystarǵa qatysý úshin qajetti biliktilik alýyna jol ashady.
«Biz bul jarystardy eń aldymen otandyq jylqy sharýashylyǵyn damytý jáne saqtaý maqsatynda ótkizemiz. Qostanai oblysynyń atynan jergilikti tuqymǵa jatatyn jylqylar men olardyń býdandarynyń qatysýy biz úshin erekshe mańyzdy. Allur kompaniiasynyń qoldaýynyń arqasynda halyqaralyq deńgeidegi jarystardy ótkizip, sportshylarymyz ben jylqy ósirýshilerimiz úshin jańa múmkindikterge jol asha alamyz», – dep atap ótti Qostanai Argymagy qorynyń direktory Altai Bimen.
Sheteldik qonaqtar da jarystyń joǵary deńgeide uiymdastyrylǵanyn atap ótti. Bala kezinen at sportymen ainalysyp kele jatqan vengriialyq shabandoz Orhideia Mihok Qostanaiǵa alǵash ret kelip, qazaqstandyq sportshylardyń daiyndyǵyna erekshe nazar aýdardy.
«Qashyqtyqqa shabatyn jarystarda shabandoz ben jylqynyń arasynda ózara túsinistik bolmasa, nátijege jetý múmkin emes. Jarys bastalǵanǵa deiin jylqynyń minezin sezinip, onymen bailanys ornatý men úshin mańyzdy boldy. Sondai-aq qazaqstandyq shabandozdardyń qanshalyqty myqty ári tózimdi ekenin kórdim. Munda tabiǵat tamasha, atmosferasy da erekshe», – dedi sportshy.
Týrnirdiń basty qorytyndysy – qazaqstandyq shabandozdardyń aiqyn basymdyǵy boldy. Olar barlyq jeti júldeli oryndy ielendi. Eń úzdik nátije kórsetken Mańǵystaý oblysynyń ókiline Arǵulan Maiqonov Qostanaida shyǵarylǵan jańa Chevrolet Cobalt avtokóliginiń kiltin tabystady. Qalǵan júldegerler aqshalai syilyqtarǵa ie boldy.
Allur Endurance CUP 2026 Qazaqstannyń halyqaralyq deńgeidegi at sportyn damytýǵa qajetti barlyq múmkindigi bar ekenin kórsetti. Elimizde myqty sportshylar, biregei jylqy tuqymdary jáne bai dástúrler qalyptasqan. Al otandyq biznestiń osyndai bastamalarǵa júieli túrde qoldaý kórsetýi ulttyq murany naqty sporttyq jetistikterge ainaldyryp, óńirler úshin jańa múmkindikter ashýǵa yqpal etedi.
