Almatyda qoǵamdyq kólikterdiń shamadan tys tolyp ketýine qatysty turǵyndardyń shaǵymy kóbeiip otyr. Jaqynda Threads áleýmettik jelisinde qala turǵyny №38 avtobýstyń ishi lyq toly bolǵandyqtan, esik jabylǵan kezde aiaǵyn qysyp qalǵanyn jazdy, dep habarlaidy dalanews.kz.
Qaladaǵy kólik basqarmasynyń málimetinshe, buǵan deiin №38 avtobýstyń qozǵalys kestesi qaita qaralǵan. Atap aitqanda, reister sany kóbeitilip, avtobýstardyń aialdamada turý ýaqyty qysqartylǵan. Alaida bul sharalar máseleni tolyq sheshpegen.
Basqarma ókilderi muny joldardaǵy kólik júktemesiniń joǵary bolýymen túsindirdi. Ásirese qarbalas ýaqytta keptelis saldarynan avtobýstardyń qozǵalysy baiaýlap, kesteden aýytqidy. Sonyń saldarynan avtobýstar arasyndaǵy ýaqyt ulǵaiyp, aialdamalarda jolaýshylar jinalyp qalady.
«Reister sanyn kóbeitý jáne qozǵalys kestesin ózgertý joldardaǵy kólik júktemesi burynǵy deńgeide qalǵan jaǵdaida máseleni ózdiginen tolyq sheshe almaidy. Tipti baǵytqa jetkilikti avtobýs shyǵarylǵannyń ózinde, keptelis olardyń ainalym ýaqytyn uzartyp, qozǵalys turaqtylyǵy men belgilengen aralyqtardyń saqtalýyna áser etedi», – dep túsindirdi basqarma.
Osylaisha, kólik basqarmasynyń pikirinshe, avtobýstardyń shamadan tys tolýyn azaitý úshin reister sanyn arttyrýmen qatar, joldaǵy keptelis máselesin de eskerý qajet.
