بەيجىڭدە "جاھاندىق وزگەرىستەر داۋىرىندەگى ەۋرازياداعى جاڭا ينۆەستيسيالىق مۇمكىندىكتەر" تاقىرىبىنا ورايلاستىرىلعان XIV حالىقارالىق شەتەلدىك ينۆەستيسيا جارمەڭكەسى جۇمىسىن اياقتادى. ءىس-شارانى قىتايدىڭ شەتەلدىك دامۋ قاۋىمداستىعى ۇيىمداستىردى، دەپ حابارلايدى Dalanews.kz.
حالىقارالىق ءىس-شاراعا قازاقستاندىق دەلەگاسيانى "اتامەكەن" ۇكپ باسقارما ءتوراعاسى رايىمبەك باتالوۆ باستاپ باردى. دەلاگاسيا قحر جانە ءبىرقاتار شەت ەلدىڭ بيزنەس وكىلدەرىمەن ينۆەستيسيالىق فورۋم جۇمىسىنا قاتىستى.
جارمەڭكەگە جۇڭگو شەتەلدىك دامۋ قاۋىمداستىعىنىڭ پرەزيدەنتى حە چجەنۆەي، قازاقستان رەسپۋبليكاسىنىڭ قىتايداعى توتەنشە جانە وكىلەتتى ەلشىسى شاحرات نۇرىشيەۆ، قازاقستاننىڭ سىرتقى ساۋدا پالاتاسىنىڭ ءتوراعاسى مۇرات قارىمساقوۆ، قازاقستاندىق كومپانيالار، ىسكەرلىك قاۋىمداستىقتار مەن ينۆەستيسيالىق قورلاردىڭ باسشىلارى قاتىستى. ءىس-شاراعا 96 ەلدەن قىتايلىق جانە شەتەلدىك بيزنەستىڭ 2200-دەن استام وكىلى، سونداي-اق 23 ەلدىڭ ەلشىلەرى مەن 196 ديپلومات قاتىستى.
ءىس-شارا مەملەكەتتەر اراسىنداعى ينۆەستيسيالىق ىنتىماقتاستىقتى تەرەڭدەتىپ، كەڭەيتۋگە جاردەمدەسەدى، ەكىجاقتى ينۆەستيسيالىق كەلىسىمدەردى ىسكە اسىرۋعا، سونداي-اق حالىقارالىق ەكونوميكالىق جانە ساۋدا مۇمكىندىكتەرىن ىزدەۋگە ىقپال ەتەدى.
قازاقستاننىڭ سىرتقى ساۋدا پالاتاسىنىڭ ءتوراعاسى مۇرات قارىمساقوۆ شەت ەلدەرگە ينۆەستيسيالاۋ مۇمكىندىكتەرىمەن تانىسۋعا كومەكتەسەتىن مۇنداي اۋقىمدى ءىس-شارا جىل سايىن ءوتىپ تۇراتىنىن اتاپ ءوتتى. بيىل قازاقستان مەن ورتالىق ازيا ەلدەرى وسى كونفەرەنسيانىڭ قۇرمەتتى قوناقتارىنىڭ قاتارىندا بولدى.
"ءبىز ەلىمىزدىڭ ينۆەستيسيالىق جوبالارى مەن مۇمكىندىكتەرىن كورسەتۋ ءۇشىن قىتايدىڭ ءىرى ينۆەستيسيالىق قورلارى مەن كومپانيالارىنىڭ وكىلدەرىمەن ءبىرقاتار كەزدەسۋ وتكىزدىك. وسى كەزدەسۋلەردە ەكونوميكانىڭ ءتۇرلى سەكتورلارى مەن قازاقستان وڭىرلەرىنە ينۆەستيسيالاۋ بويىنشا وزەكتى اقپاراتتى ۇسىندىق. فورۋم الاڭدارىندا قىتايدىڭ ەڭ ءىرى HENAN ZHENGZHOU MINING MACHINERY CO. LTD كومپانياسىنا مۇمكىندىك وڭتۇستىك قازاقستان وبلىسىنداعى تۇلكىباس اك زاۋىتىن جاڭعىرتۋعا ينۆەستيسيا سالۋعا مۇمكىندىك بەرەتىن كەلىسىمگە قول قويىلدى"، - دەدى مۇرات قارىمساقوۆ.
قازىرگى كەزدە قازاقستاندا CNPC، CITIC، NFC، SINOPEC، HUAWEI جانە باسقا دا ءىرى كورپوراسيالاردى قوسا العاندا، جۇڭگو كاپيتالى بار 2300-دەن استام كومپانيا تابىستى جۇمىس ىستەپ جاتقانىن اتاپ وتكەن ءجون.
قازاقستان مەن جۇڭگو اراسىنداعى جۇك تاسىمالىنىڭ كولەمى 2023 جىلى 22%-عا ءوستى. بۇل ۇدەرىس ەكى ەل اراسىنداعى ەكونوميكالىق بايلانىستاردىڭ دامۋى مەن نىعايۋىن ايعاقتايدى. ءىس-شارا "ءبىر بەلدەۋ، ءبىر جول" باستاماسى اياسىندا ىنتىماقتاستىقتى كەڭەيتۋدە دە ماڭىزدى ءرول اتقاردى.
