Jetisý oblysynyń ákimi Beibit Isabaev Ózbekstan Respýblikasynyń Qazaqstandaǵy Tótenshe jáne Ókiletti Elshisi Bahtier Ibragimovpen kezdesti. Taraptar ekijaqty yntymaqtastyqtyń múmkindikteri men áleýeti jaily máselelerdi talqylady,dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Resmi delegatsiiany jyly qarsy alǵan óńir basshysy Jetisý oblysynyń áleýmettik-ekonomikalyq damýynyń negizgi baǵyttary jaily qysqasha aityp berdi.
"Jetisý - agrarlyq aimaq. Biz qant qyzylshasy, júgeri, bidai, maily daqyldar, et, sút siiaqty ózimizde óndiriletin aýyl sharýashylyǵy ónimderiniń 65%-yn óńdeimiz. Oblysymyzdyń óndiristik áleýeti jaqsy. Biz kremnii, shoiyn, qorǵasyndy-qyshqyldy akkýmýliator batareialaryn, temirbeton buiymdaryn, mármár úgindilerin, shifer jáne basqa da taýarlardy eksporttaimyz. Sonymen qatar Jetisý oblysy tiimdi geostrategiialyq jáne geoekonomikalyq jaǵynan erekshelenedi. Jetisý - Qytaimen aradaǵy shekarada 5 keden beketi bar respýblikadaǵy jalǵyz óńir. Batys Eýropa – Batys Qytai transkontinentaldy avtobany bizdiń territoriia arqyly ótedi. Sondai-aq bizdiń aýmaǵymyzda «Qorǵas – Shyǵys qaqpasy» arnaiy ekonomikalyq aimaǵy jáne «Qorǵas» shekara mańy yntymaqtastyǵy halyqaralyq ortalyǵy ornalasqan. Týrizm salasynda da úlken áleýetimiz bar. Iaǵni Alakól, Balqash kólderiniń jaǵalaýy, sol siiaqty ekologiialyq jáne taý týrizmi de belsendi damyp keledi. Jalpy óńirde agroónerkásiptik keshendi damytý, kólik jáne logistika, týrizm, balamaly energetika jáne ónerkásip - jalpy 5 strategiialyq baǵytta investorlar tartý jumystary júrgizilip jatyr", - dedi B.Isabaev.
Óz kezeginde Bahtier Ibragimov jyly kezdesý úshin alǵysyn bildirip, ekijaqty qarym-qatynastardy odan ári keńeitýdiń múmkindikterin atap ótti. Sol siiaqty Ózbekstandy damytýdaǵy basymdyqtardyń biri sanalatyn týrizm salasynda tájiribe bólisýge daiyn ekenin jetkizdi. Sondai-aq elshi myrza Jetisýdan et eksporttaýǵa qyzyǵýshylyq tanytty.
Sonymen qatar óńirlik yntymaqtastyqtyń aldaǵy múmkindikterin talqylai otyryp, taraptar bul tanystyq kezdesý ekonomikalyq, saýda jáne mádeni bailanystardy nyǵaitýǵa yqpal etetinine senim bildirdi.
Jetisý oblysyna jasaǵan sapary barysynda Ózbekstannyń Tótenshe jáne Ókiletti Elshisi bastaǵan resmi delegatsiia Taldyqorǵanda biznes-qaýymdastyqpen kezdesti, al erteń «Qorǵas – Shyǵys qaqpasy» AEA, «Qorǵas» ShYHO, sondai-aq «Nur joly» avtomobil ótkizý pýnktiniń jumysymen tanysady.
Atap ótsek, 2024 jyldyń qorytyndysy boiynsha Jetisý oblysy men Ózbekstan arasyndaǵy taýar ainalymy 17 mln. AQSh dollary kóleminde boldy.
