Búgin Jetisý oblysynyń ákimi Beibit Isabaev 8 Naýryz – Halyqaralyq áielder kúnine orai saltanatty jiyn ótkizdi. Merekelik sharaǵa oblystyń túkpir-túkpirinen densaýlyq saqtaý, bilim berý, áleýmettik qorǵaý, mádeniet, sport, quqyq qorǵaý jáne qorǵanys, t.b salalarda jemisti eńbek etip júrgen kásibi mamandar, sondai-aq poshtashy, elektromehanik, óndiris tehnigi siiaqty qarapaiym jumysshy mamandyǵy ieleri sanatyndaǵy 500 áiel jinaldy. Olardyń birqataryna memlekettik nagradalar tapsyryldy, dep habarlaidy Dalanews.kz.
Saltanatty jiyn Taldyqorǵandaǵy B. Rimova atyndaǵy akademiialyq drama teatrynda uiymdastyryldy. Teatr foiesi kóktem merekesine sai bezendirilip, gúlmen kómkerildi. Qonaqtardyń barlyǵyna bir shoq jaýqazyn, quttyqtaý haty men estelik syilyqtar tabystaldy.
Sharada quttyqtaý sóz sóilegen Beibit Isabaev áielderdiń óńirdi damytýdaǵy róli erekshe ekenine toqtaldy:
- Sonaý erte kezden-aq qazaq qoǵamynda áielderdiń laiyqty orny qalyptasqan. Búgingi kúni bul igi dástúr jańa mazmunmen tolyǵyp, ana men balaǵa degen qamqorlyq, otbasy institýtynyń rólin arttyrý memlekettik saiasattyń mańyzdy bóligine ainaldy. Qai-qaisylaryńyz da úi men túzdiń jumysyn abyroimen qatar atqaryp, týǵan jerge, elge degen súiispenshiliktiń, januia men áýletke qamqorlyq pen janashyrlyqtyń úlgisin kórsetip kelesizder. Sizderdiń jaýapty, talapshyl da tabandy, jarqyn da jańashyl minezderińiz qoǵamdy ilgeriletýge, igi bastamalarǵa tyń serpin beredi. Osy oraida eldiń damýyna qosyp júrgen eleýli úlesterińiz úshin barshańyzǵa shynaiy alǵysymdy bildiremin, - degen óńir basshysy budan ári marapattaý rásimine kóshti.
Bul rette segiz adam memlekettik nagradaǵa ie boldy. Atap ótsek, solardyń ekeýi - sharýa qojalyǵynyń jetekshisi Shakira Ydyrysova I dárejeli «Eńbek dańqy» ordenin, «Úshtóbe-Aidyn» JShS quryltaishysy Aibarsha Beskempirova III dárejeli «Eńbek dańqy» ordenin Astana qalasynda Memleket basshysynyń qolynan alǵan bolatyn. Al Jetisý oblysynyń qarjy basqarmasynyń basshysy Janar Kerimbekova men oblys ákimi apparatynyń bólim basshysy Elmira Jyrǵalbaevaǵa «Qurmet» ordenin, Kerbulaq aýdanyndaǵy Qoǵaly orta mektebiniń direktory Nurgúl Arpabekovaǵa, Alakól aýdanynyń mansap ortalyǵynyń direktory Lázzat Qosantaevaǵa «Eren eńbegi úshin» medalin, Taldyqorǵan qalalyq kópsalaly aýrýhanasynyń aǵa meiirgeri Baqytgúl Imanbekovaǵa «Shapaǵat» medalin, sol siiaqty qarataldyq zeinetker pedagog, K.Toqaev atyndaǵy qaiyrymdylyq qorynyń ókili Valentina Spiridonovaǵa «Qazaqstannyń eńbek sińirgen qairatkeri» qurmetti ataǵyn, oǵan qosa oblystyq qoǵamdyq keńestiń múshesi Dániia Qydyrbaevaǵa Prezidenttiń quttyqtaý ashyq hatyn osy kúni oblys ákimi tapsyrdy. Sol siiaqty taǵy on kóp balaly anaǵa «Altyn alqa», «Kúmis alqa» berildi.
Marapattalǵandardyń atynan sóz alǵan bilim salasynda otyz jyldan beri jumys isteitin Nurgúl Arpabekova rizashylyǵyn jetkizip, jinalǵan kópshilikti quttyqtady.
- Búgin meniń memlekettik marapat - «Eren eńbegi úshin» medalin alýym úlken mártebe ári jaýapkershilik dep bilemin. Bul nagrada – meniń ǵana emes, birlese eńbek etken bizdiń pedagogikalyq ujymnyń urpaq tárbiesine sińirgen ortaq jumysynyń jemisi. Memleket basshysyna eńbegimdi baǵalap, joǵary marapat bergeni úshin alǵysymdy bildiremin. Marapattalýshylardy shyn júrekten quttyqtap, bar jaqsylyqty tileimin, - dedi ol.
Sol siiaqty merekege kelgen ózge qatysýshylar da izgi tilekterin bildirip, oi bólisti.
– Men kásibi mýzykantpyn, qazir zeinettemin, degenmen áli de shyǵarmashylyqpen ainalysyp kelemin. Bizdiń otbasylyq ansamblimiz bar, jubaiym, eki qyzym, ulym, kelinim – bárimiz birge óner kórsetemiz. Biz qazaqtyń halyq ánderin jáne qazirgi estradalyq ánderdi oryndaimyz. Bizdiń repertýarymyzda ásirese anaǵa, Otanǵa arnalǵan ánder kóp. Mereke qarsańynda biz Turpan aýylynda jerlesterimizge arnap kontsert uiymdastyrdyq, oǵan shamamen 200 adam jinaldy. Biz siiaqty shyǵarmashylyq adamy úshin kórermenderdiń súiispenshiligi men qoshemeti – eń basty syilyq. 8 naýryz merekesine arnalǵan búgingi saltanatty sharaǵa shaqyrylǵanyma óte qýanyshtymyn. Oblystyń barlyq áielderine densaýlyq, amandyq, beibit ómir tileimin, – dedi Panfilov aýdanynan kelgen mádeniet ardageri Ainagúl Haibýllaeva.
Osyndai quttyqtaý tilekke «Sýffle Qazaqstan» ashytqy zaýyty» AQ óndiristik tsehynyń bastyǵy, Tekeli qalasynyń turǵyny Natalia Andriýtina da qosyldy:
– Men zaýytta 2013 jyldan beri jumys isteimin, iaǵni ýniversitetti bitirgennen keiingi eńbek jolymdy osy kásiporynda laborant bolyp bastadym, qazir óndiris tsehynyń bastyǵy qyzmetindemin. Mundai nátijege eńbekqorlyqtyń, tártiptiń, uqyptylyqtyń, ujymymyzdyń uiymshyldyǵy men bir-birine degen ózara seniminiń arqasynda jettim. Ásirese meni erekshelep, Halyqaralyq áielder kúnine arnalǵan oblystyq merekelik sharaǵa shaqyrǵandaryna qýandym. Bul – bizdiń búkil komandamyzdyń ortaq jetistigi. Jalpy, mańaiymyzdaǵy merekelik kóńil kúi, balalarymyzdyń quttyqtaýy, búgingi jyly lebizder, úidegi jáne ujymdaǵy qoldaý, bári-bári bizge kóktemniń shynaiy jylylyǵyn sezindirip tur. Óńirdiń barlyq áiel azamattaryna baqyt, jaqsylyq tileimin, eń asyl armandary oryndalsyn, – dedi ol.
«Shapaǵat» medaline ie bolǵan Baqtygúl Imanbekova da oi qosty:
- Búgingi merekege qatysqan barsha áielderdi quttyqtaimyn. Meditsina salasynda 37 jyldyq eńbek ótilim bar, sonyń ishinde jansaqtaý bóliminde jumys istegenime 30 jyl boldy. Bul bólim - asa jaýapty da kúrdeli qurylymynyń biri. Bizdiń eńbegimizdi elep, osyndai qurmet kórsetip, qoldaý tanytqandaryńyzǵa alǵysymdy bildiremin, - dedi ol.
Saltanatty jiyn merekelik kontsertpen aiaqtaldy.
Atap ótsek, osyndai quttyqtaý sharasy barlyq aýdan-qalalarda ótkizildi.
