Jetisý oblysynyń ákimi Beibit Isabaev oblystyq ardagerler uiymdarynyń ókilderimen kezdesip, jinalǵan kópshilikti Otan qorǵaýshylar kúnimen quttyqtady,- dep habarlaidy Dalanews.kz
Jiynda óńir basshysy aimaqtyń áleýmettik-ekonomikalyq damýy týraly qysqasha baiandap, oblystyń damýyna qosqan úlesteri úshin ardagerlerge rizashylyǵyn bildirdi.
- Prezidentimiz Qasym-Jomart Toqaev «Eń bastysy, memleket pen qoǵamnyń erekshe qorǵaýynda bolatyn qurmetti ardagerlerimizge airyqsha kóńil bólemiz», - degen bolatyn. Soǵan sáikes biz jyl saiyn ardagerlerge qoldaý sharalaryn turaqty kórsetip kelemiz. Óńirdiń qoǵamdyq ómirine úles qosa otyryp, sizder óskeleń urpaqty patriottyq rýhta tárbieleýge qoldaý kórsetip kelesizder. Osy oraida oblysta iske asyrylyp jatqan «Ádep-quqyqtyq jumys jónindegi mentor» jobasyna belsene qatysqandaryńyz úshin alǵys aitamyn. Sizder siiaqty azamattardyń júrgizgen dáristerine 6 myńdai oqýshy tartyldy. Jeńistiń 80 jyldyǵyna jáne Otan qorǵaýshylar kúnine arnalǵan is-sharalarda da belsendilik tanytasyzdar dep senemin, - degen B. Isabaev munan soń marapattaý rásimin atqardy.
13 ardagerge oblys ákiminiń Alǵys haty tapsyryldy.
Atap ótsek, kezdesýge óńirdegi birqatar ardagerler uiymdarynyń músheleri, sonyń ishinde Aýǵan soǵysyna qatysýshylar, Chernobyl apatynyń zardabyn joiýǵa qatysqandar, Semei poligonynan zardap shekkender, Jeltoqsan oqiǵasyna, Tájik-Aýǵan oqiǵasyna, Taýly Qarabaqtaǵy áskeri is-qimyldarǵa qatysýshylar, oblystyq Ardagerler keńesiniń músheleri keldi.
Kezdesýde «Aýǵan soǵysy ardagerleriniń keńesi» qoǵamdyq birlestiginiń tóraǵasy Baýyrjan Barlybaev pikirin bildirip, ardagerlerge kórsetilgen syi-qurmet úshin alǵysyn jetkizdi, jastarǵa aqyl-keńesin aitty:
- Birinshi kezekte barshańyzdy alda kele jatqan Otan qorǵaýshylar kúnimen jáne Jeńistiń 80 jyldyǵymen quttyqtaimyn. Biz ata-babalarymyzdyń erligin eshqashan umytpaimyz, ony urpaqtan-urpaqqa jetkizemiz. Jastarǵa aitarym, Armiia qatarynda qyzmet etýden qashpaý kerek. Óitkeni Otandy qorǵaý - ár azamattyń qasterli paryzy. Biz ardager aǵa býyn retinde jastardy patriottyq rýhta tárbieleýge óz úlesimizdi qosa beremiz, - dedi B. Barlybaev.
