Jalynǵa oranǵan páterden balalardy aman alyp shyqty
Sondai iri júrekti azamattardyń biri – Jetisý oblysy Tótenshe jaǵdailar departamentiniń qyzmetkeri, serjant Nursultan Baimuhambetov. Ol 2019 jyldan bastap órt sóndirýshi bolyp jumys isteidi. Ony óz mindetin abyroimen atqaryp, úlken jaýapkershilikpen qaraityn úzdik mamandardyń biri dep ataýǵa da ábden bolady.
«2020 jyldyń 14 maýsymynda saǵat 23:50-de bizdiń bólimshege «Bolashaq» shaǵyn aýdanyndaǵy páterde órt shyǵyp jatqany týraly habarlama tústi. Nursultan Baimuhambetov birden birinshi jasaqpen 5-qabattaǵy páter órtenip jatqan aýmaqqa bardy. Osy kezde órt sóndirýshiler birden naqty ári ýaqytyly tapsyrmany oryndaýǵa kirisip, qyzyl jalynnan eki adamdy qutqaryp, jedel járdem qyzmetkerleriniń qolyna tapsyrdy.
2021 jyldyń 14 qańtarynda bizge «Músheltoi» shaǵyn aýdanyndaǵy turǵyn úidiń 4-qabatyndaǵy páterde órt shyqqany týraly qońyraý tústi. Ol kezde de Nursultan Baimuhambetov oqiǵa ornyna alǵashqylardyń biri bolyp jetip, dereý qutqarý jáne órt sóndirý jumystaryna kirisip ketti.
Bul kezde páterde kámeletke tolmaǵan balalar bolǵan. Baimuhambetov muny bilgen boida táýekelge bel býyp, páterge birinshi bolyp kiredi. Onyń batyl áreketiniń arqasynda balalar din aman qalyp, olarǵa meditsinalyq kómek kórsetildi», - deidi órt sóndirý bóliminiń bastyǵy Shoqan Nurtazin.
2021 jyly Qazaqstan Respýblikasy Tótenshe jaǵdailar ministrliginiń buiryǵymen belsendi qyzmeti jáne avariialyq-qutqarý jumystaryna belsene qatysqany úshin Nursultan Baimuhambetov «Tótenshe jaǵdaidaǵy erligi úshin» medalimen marapattaldy. Al 2022 jyly Jetisý oblysy ákiminiń «Kóshbasshy – 2022» jastar syilyǵynyń «Úzdik jas qaharman» atalymynyń laýreaty atandy.
Mundai qyzmet qanshalyqty qaýipti bolsa, qoǵam úshin soǵurlym paidaly jáne qundy. Ómirine qaýip tónip, ózgeniń ómirin saqtap qalǵandar qyzyl jalyn qutyrǵan saiyn erlik jasaidy.
Jasynan órt sóndirýshi bolýdy armandaǵan
Qaraǵandy oblysy Tótenshe jaǵdailar departamenti Órt sóndirý jáne avariialyq-qutqarý jumystary qyzmetiniń órt sóndirýshi-qutqarýshysy azamattyq qorǵaý kishi serjanty Erlan Arynov ta kún saiyn óz ómirine tóngen qaýippen betpe-bet keledi. Kóptegen iri jalyndardy aýyzdyqtaý kezinde aldyńǵy shepte júrip, óziniń batyldyǵyn birneshe ret dáleldegen.
«Jumys barysynda 2021 jyly monsha kesheninde bolǵan úlken órt oqiǵasy esimnen ketpeidi. Órt ornyna birinshi bolyp bir jasaq jetti. Órtenip jatqan ǵimaratta adamdar bar ekenin bilip, gaz-tútinnen qorǵaý qyzmetiniń quramynda bes adamdy evakýatsiialap úlgerdik. Basqa órt sóndirý bólimsheleri kele salyp, órtti sóndirýge kiristi. Men bul mamandyqty tańdaǵanyma ókinbeimin, óitkeni men adamdarǵa kómekteskendi jáne memleketime paidamnyń tigenin jaqsy kóremin. Órt sóndirý qyzmetiniń mamandary úshin árbir qutqarylǵan adam úlken qýanysh ákeledi», - deidi Erlan Arynov.
Erlan bul salada tórt jyldan beri eńbek etip keledi. Qyzmet etý merzimi qysqa bolsa da, búginde jaýapty da erjúrek mamandardyń biri. Ol batyldyǵymen jáne qaisarlyǵymen erekshelenedi.
– Bizde óte tatý ujym bar jáne jigitter bir-birine qyzmette ǵana emes, odan tys ýaqytta da kómektesýge ázir. Men muny maqtanysh tutatymn. Jalpy jumysqa kelsek, qyzmet kórsetý bizdiń tikelei jumysymyz, árkim óz ornynda bolýy tiis. Biz árqashan saqadai saimyz jáne kez kelgen ýaqytta eshbir ásireleýsiz kómek kórsetýge daiynbyz, – dep atap ótti ol.
Erlannyń jumysqa degen yntasyn oiatatyny – tabandylyq tanytyp, qiynshylyqqa tap bolǵan adamdarǵa kómektesý múmkindigi. Órt sóndirýshi bolý ońai jumys emes ekenin jaqsy biledi. Tózim men sabyrǵa erik berý qajet, kásibi jáne dene daiyndyǵy joǵary bolýy tiis. Mundai údeden barlyǵy birdei shyǵa bermeidi. Erlan ómir boiy sportpen ainalysqan, sondyqtan ol órt sóndirýshi bolatynyna senimdi boldy, óitkeni sportshyǵa da osyndai talaptar qoiylady.
«Men kásibi túrde damyǵym keledi. Qazir men kóp jumys istep, bir orynda turyp qalmaýǵa tyrysamyn jáne jasóspirim kezimde ómirimdi bailanystyrýdy uiǵarǵan mamandyǵym boiynsha únemi izdenis ústindemin», - deidi órt sóndirýshi-qutqarýshy.
Qutqarýshy bolyp júrgenine jiyrma jylǵa jýyqtady
Taǵy bir keiipkerimiz – Saiat Rýstambekov azamattyq qorǵaý organdarynda 2004 jyldyń tamyz aiynan beri qyzmet etip keledi. Búginde Jambyl oblysy Tótenshe jaǵdailar departamenti Órt sóndirý jáne avariialyq-qutqarý jumystary qyzmeti Jedel-qutqarý jasaǵy súńgýir-qutqarý bóliminiń bas qutqarýshysy.
Saiat Rýstambekov qyzmetke kirisken alǵashqy kúnnen-aq ujym ómirine belsene aralasyp, kásibi sheberligin kúnde shyńdap keledi. 20 jyl boiy eńbek etip, talai adamnyń ómirin saqtap qaldy, kóptegen sý astyndaǵy izdestirý-qutqarý jumystaryna qatysty.
«Súńgýir ár sekýnd saiyn ómirin qaterge tigip, qiyn jaǵdaida jumys isteidi. Bastapqyda súńgýir muz astyna túskende, muny óziniń ómiri ekenin túsinedi. Qandai da bir alańdaýshylyq seziminiń bolatynyn da jasyra almaimyn. Tabiǵi emes jaǵdaidaǵy tynys alý ári sol jabdyqqa degen senimsizdik báribir oidy san-saqqa júgirtedi. Al mundai sezimdi jeńý úshin temirdei ustamdylyq qajet, árine, óz isińizge degen úlken súiispenshiliktiń de bolýy asa mańyzdy. Áitpese, súńgýir bolyp uzaq ýaqyt eńbek ete almaisyz. Al meniń osy salada júrgenime jiyrma jylǵa jýyqtap qaldy», - dedi ol.
Saiat kóptegen adamdardyń ómirin saqtap qalǵan. Máselen, ótken jyldyń 31 mamyrynda qutqarýshylar Talas ózenine 10 jasar balanyń batyp bara jatqanyn baiqap qalady. Qatty aǵysqa qaramastan Saiat Rýstambekov pen áriptesi esh oilanbastan, bir minýtty bosqa ótkizbei, sýǵa qoiyp ketti. Ázer degende, olar balany aman alyp qaldy. Qutqarýshylar aldyn alý jumystaryn júrgizbegende, onyń taǵdyry ne bolaryn elestetý tipti qiyn edi.
Tańdaǵan mamandyǵyna sai bolý úshin, óziniń ázirlik qalpyn saqtap qalý úshin qutqarýshylar kóp jattyǵady. Bólimshelerde órt sóndirý kezinde týyndaýy múmkin jaǵdailardy pysyqtaýǵa arnalǵan bólmeler jabdyqtalǵan. Sondai-aq, bul mamandyqtaǵy azamattar kóp jylǵy tájiribesine, biliktiligine qaramastan, olar óz jumystarynda kóp ýaqyt ótkizedi, órt sóndirýdiń qyr-syrymen tanysady, naqty mysaldar men oqiǵalardy paidalana otyryp, órt elementimen kúresýdegi kúrdeli jaǵdailardy taldaidy, talqylaidy.
Biz elimizde osyndai batyrlar kóp bolǵanyn qalaimyz, eń bastysy, osyndai kásipqoilar qyzmetke kelgende balalarymyz ben jaqyndarymyzdyń qaýipsizdigine alańdamaimyz.
Ashat Qoishyǵarauly
