Abai oblysynda Besterek aýylynda bolǵan jol-kólik oqiǵasyna qatysty rezonansty sot protsesi aiaqtaldy. Atalǵan iste avtokólik astynda qalǵan alty balanyń tórteýi qaza tapqan. Sot 55 jastaǵy júrgizýshini kináli dep tanydy, dep habarlaidy Dalanews.kz.
Sot úkimimen aiyptalýshy Qylmystyq kodekstiń 345-babynyń 4-bóligi«Jol qozǵalysy qaǵidalaryn buzý saldarynan abaisyzda eki nemese odan da kóp adamnyń ólimine ákep soǵý» boiynsha kináli dep tanyldy.
Oǵan 9 jylǵa bas bostandyǵynan aiyrý jazasy taǵaiyndalyp, jazany eń tómen qaýipsizdik deńgeiindegi koloniiada óteý belgilendi. Sonymen qatar sot júrgizýshini 7 jyl merzimge kólik quralyn basqarý quqyǵynan aiyrdy.
Sýdianyń túsindirýinshe, aiyptalýshynyń kinási sot barysynda tolyq dáleldengen. Jeńildetetin mán-jai retinde onyń kámeletke tolmaǵan balasynyń bar ekeni jáne kinásin tolyq moiyndaýy eskerilgen. Al qylmysty jas balalarǵa qatysty jasaýy — aýyrlatatyn mán-jai dep tanylǵan.
Budan bólek, sot aiyptalýshyny jábirlenýshilerge moraldyq jáne materialdyq shyǵyndy óteýge mindettedi.
Apat saldarynan eki jasar ulynan aiyrylǵan Ernar Bulanbaev pen onyń jubaiyna sot árqaisysyna 10 million teńgeden moraldyq ótemaqy taǵaiyndady.
Al jol apatynda úsh balasynan aiyrylǵan Tańsholpan Karimova men onyń jubaiyna árqaisysyna 15 million teńgeden moraldyq ziian ótemi belgilendi. Sonymen qatar 336 myń teńge materialdyq shyǵyn jáne árqaisysyna 200 myń teńgeden ókildik shyǵyn óndirý sheshildi.
