Besqaraǵaida palýandar kúsh synasty
Búginde Shyǵys Qazaqstan oblysy ákimdigi qazaq kúresiniń ósip, órkendeýine barynsha qoldaý kórsetip keledi. Mundai aitýly sporttyq sharalar Shyǵysta oblys ortalyqtaryn bylai qoiǵanda aýdan, aýyldarda jii uiymdastyrylyp jatqanyn sportsúier qaýym jaqsy biledi.
Besqaraǵai aýylyndaǵy Ortalyq stadionda beldesip, baqtaryn synaý úshin elimizdiń 14 oblysynan 40 palýan qatysqanyn aita ketýimiz kerek. Olardyń arasynda «Qazaqstan barysy» ataǵyn qanjyǵasyna bailaǵan Aibek Nuǵmarov, Muhit Tursynov, Beibit Ystybaev bastaǵan myqty palýandarymyz bar.
Sporttyq sharany aýdandaǵy kásipkerler, ardagerler men qoǵam qairatkerleri Elbasy Nursultan Nazarbaevtyń «Rýhani jańǵyrý» maqalasynda atap kórsetilgen «Týǵan jer» baǵdarlamasy sheńberinde uiymdastyryp, iske asyrǵanyn esterińizge sala ketemiz. Osylaisha sharany uiymdastyrýshylar halyq arasynan talantty jastardyń jarqyrap kórinýine jol ashyp otyr. Óz kezeginde aýdandaǵy kásipkerler biznestiń áleýmettik jaýapkershiligi aiasynda atalǵan sharaǵa bir kisidei atsalysyp, qoldaý bildirgen.
Jalpy alǵanda jer-jerde qazaq kúresin damytý arqyly óskeleń urpaqtyń boiynda otansúigishtik qasietti oiatyp, Elbasy atap ótken rýhani jańǵyrýǵa umtylýdyń mańyzy zor. Sondyqtan Shyǵys Qazaqstan oblysy ákimdigi uiymdastyrǵan bul shara ózge oblystarǵa úlgi bolarlyq bastama desek artyq aitqandyq bolmas.
Besqaraǵai aýdany turǵyndarynyń qyzyǵýshylyǵyn oiatqan shara barysynda «Batamen el kógerer» degen teatrlandyrylǵan kórinis uiymdastyrylyp, jinalǵan qaýymǵa án-jyrdan shashý shashyldy. Óz kezeginde besqaraǵailyq jastar «EKSPO-2017», «Sport» jáne «Bir shańyraq astynda» degen taqyryptar aiasynda fleshmob uiymdastyryp, halyqtyń kóńil-kúiin kóterdi.
