بۇگىندە شىعىس قازاقستان وبلىسى اكىمدىگى قازاق كۇرەسىنىڭ ءوسىپ، وركەندەۋىنە بارىنشا قولداۋ كورسەتىپ كەلەدى. مۇنداي ايتۋلى سپورتتىق شارالار شىعىستا وبلىس ورتالىقتارىن بىلاي قويعاندا اۋدان، اۋىلداردا ءجيى ۇيىمداستىرىلىپ جاتقانىن سپورتسۇيەر قاۋىم جاقسى بىلەدى.
بەسقاراعاي اۋىلىنداعى ورتالىق ستاديوندا بەلدەسىپ، باقتارىن سىناۋ ءۇشىن ەلىمىزدىڭ 14 وبلىسىنان 40 پالۋان قاتىسقانىن ايتا كەتۋىمىز كەرەك. ولاردىڭ اراسىندا «قازاقستان بارىسى» اتاعىن قانجىعاسىنا بايلاعان ايبەك نۇعماروۆ، مۇحيت تۇرسىنوۆ، بەيبىت ىستىبايەۆ باستاعان مىقتى پالۋاندارىمىز بار.
سپورتتىق شارانى اۋدانداعى كاسىپكەرلەر، ارداگەرلەر مەن قوعام قايراتكەرلەرى ەلباسى نۇرسۇلتان نازاربايەۆتىڭ «رۋحاني جاڭعىرۋ» ماقالاسىندا اتاپ كورسەتىلگەن «تۋعان جەر» باعدارلاماسى شەڭبەرىندە ۇيىمداستىرىپ، ىسكە اسىرعانىن ەستەرىڭىزگە سالا كەتەمىز. وسىلايشا شارانى ۇيىمداستىرۋشىلار حالىق اراسىنان تالانتتى جاستاردىڭ جارقىراپ كورىنۋىنە جول اشىپ وتىر. ءوز كەزەگىندە اۋدانداعى كاسىپكەرلەر بيزنەستىڭ الەۋمەتتىك جاۋاپكەرشىلىگى اياسىندا اتالعان شاراعا ءبىر كىسىدەي اتسالىسىپ، قولداۋ بىلدىرگەن.
جالپى العاندا جەر-جەردە قازاق كۇرەسىن دامىتۋ ارقىلى وسكەلەڭ ۇرپاقتىڭ بويىندا وتانسۇيگىشتىك قاسيەتتى وياتىپ، ەلباسى اتاپ وتكەن رۋحاني جاڭعىرۋعا ۇمتىلۋدىڭ ماڭىزى زور. سوندىقتان شىعىس قازاقستان وبلىسى اكىمدىگى ۇيىمداستىرعان بۇل شارا وزگە وبلىستارعا ۇلگى بولارلىق باستاما دەسەك ارتىق ايتقاندىق بولماس.
بەسقاراعاي اۋدانى تۇرعىندارىنىڭ قىزىعۋشىلىعىن وياتقان شارا بارىسىندا «باتامەن ەل كوگەرەر» دەگەن تەاترلاندىرىلعان كورىنىس ۇيىمداستىرىلىپ، جينالعان قاۋىمعا ءان-جىردان شاشۋ شاشىلدى. ءوز كەزەگىندە بەسقاراعايلىق جاستار «ەكسپو-2017»، «سپورت» جانە «ءبىر شاڭىراق استىندا» دەگەن تاقىرىپتار اياسىندا فلەشموب ۇيىمداستىرىپ، حالىقتىڭ كوڭىل-كۇيىن كوتەردى.
