Besqaraǵai aýdanynyń «Mýkinov» sharýa qojalyǵynyń Baitory jáne Shoiynqara jylqylary respýblikalyq IV at kórmesinde júldeli birinshi orynǵa ie boldy, dep habarlaidy Dalanews.kz
Aýdan maqtanyshyna ainalǵan Besqaraǵai tiptes Baitory men Shoiynqara atalyq izderi 2022 jyly «Besqaraǵai» dep atalatyn qazaqy jylqynyń jańa tipin qalyptastyrǵan bolatyn.
Genetikalyq negizine bailanysty atalmysh qylquiryqtarǵa Shoiynqara jáne Baitory ataýlary berilgen. Olardyń basty ereksheligi – kez kelgen aýa raiyna tózimdiligi, iri deneli ári etti-sútti bolýy. Tebindegi aiǵyrlary 700 kelige, bieleri 600 kelige deiin jetedi. Sonymen qatar, bul jylqylar miniske de, jegiske de shydamdy.
Selektsiia jumysyna Almatydaǵy Qazaq ulttyq agrarlyq ýniversiteti men Semeidegi Shákárim ýniversitetiniń ǵalymdary úles qosty. Aita keterligi, qazaqy jylqylardy býdandastyrý arqyly jańa tip shyǵarý isi 1968 jyldan bastaý alǵan.
