Abai oblysynyń ákimi Berik Ýáli orynbasary D.Garikov, Tótenshe jaǵdai departamenti basshysynyń orynbasary A.Shtykelmen birge Borodýliha, Jańa Semei aýdandary men Semei qalasynyń sý basý qaýpi bar aýmaqtaryn áýeden tekserdi,- dep habarlaidy Dalanews.kz
Tikushaqpen barlaý barysynda Shúlbi sý elektr stantsiiasyndaǵy gidrologiialyq jaǵdaiǵa, kóktemde Ertis pen Ýba ózenderindegi sý deńgeii kóteriletin qaýipti oryndarǵa den qoiyldy. Muz jarý jumysy júrgizilgen eldi mekender de nazardan tys qalmady.
Aimaq basshysy Borodýliha aýdanyndaǵy Krasnyi Iar, Peremenovka aýyldary men Jezkent kenti aýmaǵyndaǵy qar deńgeiin áýeden baqylady. Atalǵan eldi mekender mańynda jyl saiyn muz jarý jumysy júrgiziledi. Óitkeni, gidroqurylymdar jaqyn ornalasqan.
"Búgin ózenderde muz jarý jumysyn júrgizýge daiyndyq barysy da tekserildi. Oblystyń basqa da aýdandaryndaǵy tasqyn qaýpi bar eldi mekenderdi turaqty baqylaýda ustap otyrmyz. Kúndelikti monitoring júrgizemiz. Aimaq basshysyna óńirdegi ahýaldy tolyq baiandadym", - dedi Abai oblysy ákiminiń orynbasary Dimitrii Garikov.
Ertis ózeni men eldi mekenderdi tikushaqpen barlaý barysynda qardyń qalyńdyǵy baiqalǵanymen qardyń erýi anyqtalmady. Ertis pen Ýba ózenderinde muz súńgileri joq. Alaida Ertis ózeniniń Semei qalasy Holodnyi kliých eldi mekeni aýmaǵynda muz keseginiń jinalýy baiqalady.
Eki aýdan men oblys ortalyǵyndaǵy gidrologiialyq jaǵdaidy baǵamdaǵan oblys ákimi ózenderdegi sý deńgeiin, óńirdegi barlyq sý bógenderin, sý ótkizý qurylǵylaryn jiti baqylaýda ustaýdy tapsyrdy.
"Aldaǵy ýaqytta Besqaraǵai aýdanynyń Jetijar, Krivinka aýyldary men Semei qalasy aýmaǵyndaǵy Ertis ózeninde muz jarý jumysy júrgiziledi. Bul jumysty jalǵastyrý qajet. Jaqyn arada Besqaraǵai, Úrjar, Maqanshy, Aqsýat aýdandaryna baryp, sý tasqynyna daiyndyq barysyn kóremin. Qazirgi tańda óńirdegi ahýal turaqty", - dedi oblys ákimi.
