Abaı oblysynyń ákimi Berik Ýálı Semeı qalasyn damytý boıynsha keńes ótkizdi,- dep habarlaıdy Dalanews.kz

Qala ákimi, oblystyń tıisti basqarma jáne shahardyń bólim basshylary qatysqan jıynda oblys ortalyǵyn abattandyrý, kógaldandyrý, joldardy jóndeý, saıabaqtardy, mádenı-tarıhı ǵımarattardy jańǵyrtý, salý jaıy talqylandy.

«Endi ár apta saıyn Semeı qalasyn damytý, kórkeıtý boıynsha osyndaı keńes ótkizip otyramyz. Shahardy órkendetý boıynsha joba-josparlardy talqylaımyz. Qalada qordalanǵan másele kóp. Alda úlken jumys kútip tur. Sol sharýalardy tize qosyp, birlese sheshýimiz kerek. Semeı – oblystyń aınasy. Aýdan-aýyldar oblys ortalyǵyna qarap boı túzeıdi. Qala soǵan saı bolýy kerek. Onyń ústine bıyl – Abaı Qunanbaıulynyń 180 jyldyǵy. Prezıdent Qasym-Jomart Toqaev «Uly Abaıdyń mereıtoıyn laıyqty atap ótýimiz kerek» dep tapsyrǵan bolatyn. Daıyndyq sharalaryn kúsheıtýimiz kerek»,- dedi oblys ákimi.

Keńeste Semeı qalasynyń ákimi Talǵat Muratov bıylǵa josparlanǵan jobalar týraly baıandady. Aımaq basshysy shahardy abattandyrý baǵytyndaǵy bastalǵan jumysty jalǵastyryp, ózekti máselelerdi sheshý, ınvestısıa tartý boıynsha naqty jospar ázirleýdi tapsyrdy.