Búgin Abai oblysynyń ákimdiginde aimaq basshysy Berik Ýálidiń tóraǵalyǵymen keńeitilgen apparattyq keńes ótti. Jiynǵa oblystyq basqarma basshylary, óńirlik departament jetekshileri, al qala jáne aýdan ákimderi beinerejimde qatysty,- dep habarlaidy Dalanews.kz
Keńeste óńirde kóktemgi egis jumystaryn júrgizý jáne shalǵai eldi mekender men Alakól jaǵalaýynda internet sapasyn jaqsartý máselesi qaraldy.
Jiynda Aýyl sharýashylyǵy basqarmasynyń basshysy Ertai Qýanbaev aimaqtaǵy egis jumystary týraly baiandady. Úrjar, Borodýliha, Kókpekti, Besqaraǵai, Jarma aýdandarynyń ákimderi beinerejimde qosymsha aqparat berdi.
Basqarmanyń málimetinshe, kóktemgi egis jumystary barlyq aýdandarda bastalǵan. 12 900 tehnika jumyldyrylǵan. Biyl oblysta 753,1 myń gektar alqapqa aýyl sharýashylyǵy daqyldary egilmek. Bul ótken jylmen salystyrǵanda 3,6 myń gektarǵa artyq. Óńirdiń egis alqaptaryna 46,2 myń tonna tuqym daiyndalǵan. Oblystyń aýyl sharýashylyǵy taýaryn óndirýshilerine 27,5 myń tonna arzandatylǵan dizel otyny bólingen.
Jiynda Úrjar, Borodýliha, Kókpekti, Besqaraǵai aýdandarynda mineraldy tyńaitqyshtardy engizý kórsetkishi tómen deńgeide ekeni atap ótildi. Jańasemei, Maqanshy jáne Borodýliha aýdandaryna «Keń dala» baǵdarlamasy sheńberinde dihandarǵa kóktemgi egis pen kúzgi jiyn-teringe jeńildikpen beriletin nesie boiynsha jumysty jandandyrý júkteldi.
Oblys ákimi keńeste kóktemgi dala jumystaryn 25 mamyrǵa deiin, tehnika jańartý josparyn 1 qarashaǵa deiin aiaqtaýdy tapsyrdy.
«Jaqynda Kókpekti aýdanyna barǵan saparymda ósimdik, et jáne sút baǵytyndaǵy sharýashylyqtardyń jumysymen tanystym. Aýdandaǵy sharýa qojalyqtary birigip, ózderi qor quryp, basqa sharýalarǵa kómek berý mehanizmin tiimdi iske asyryp otyr. Aýyl sharýashylyǵy basqarmasyna osy tájiribeni oblysta keńinen taratý úshin Jol kartasyn ázirlep, usynýdy tapsyramyn», - dedi aimaq basshysy.
