Ult úmitin aqtaǵan el erteńi jastarǵa durys tárbıe, týra baǵyt-baǵdar berý máselesi Almaty Ortalyqtandyrylǵan kitiphana júıesine qarasty №20 bólimshesiniń ustanǵan basty baǵyttarynyń biri. Alash jurtynyń ańsaǵan táýelsizdigi men birligi, yntymaǵy men tarıhynyń murageri bolatyn jastarǵa arnalǵan nátıjeli jobalar men aýqymdy is-sharalardy kún tártibine engizip, sol baǵyttaǵy jumystaryn jandandyryp keledi. Jýyrda ǵana kitaphananyń «Senimen bolashaq» respýblıkalyq ata-analar qoǵamdyq birlestiginiń Almaty fılıalymen birlese uıymdastyrǵan «Otan otbasynan bastalady» atty semınar-trenıngi sózimizge dálel bola alady.
Evrazıalyq tehnologıalyq kolejiniń İ kýrs stýdentteriniń qatysýymen ótken is-shara kitaphana meńgerýshisi Laýra Máýlitsháripqyzynyń kirispe sózimen ashyldy. Jaqynda ǵana atalyp ótken «Otbasy kúni» týraly oı qorytqan meńgerýshi basqosýdyń basty maqsaty da ata-anany syılaý, qadirleý, otbasylyq ómirge daıyn bolý, sońǵy kezde beleń alyp ketken sýısıdtiń aldyn alý ekendigin atap ótti. «Senimen bolashaq» RQB ókili Merýert Máýletqyzy oqý-bilimmen qatar rýhanı-tanymdyq saýattylyqtyń da kerek ekenin, ishki rýhyń myqty bolsa qol jetkizer jeńis kóp bolaryn alǵa tartty. Al psıholog, koých-trener, «Tájirıbeli psıhologıa» RQB Almaty fılıalynyń dırektory, «Senimen bolashaq» RQB fılıal eksperti Aıgúl Islambekqyzy búgingi zamannyń bolmysy men kelbetine saı tanym men tárbıe jaıly túsinik berdi. Jastarǵa oılantatyn suraqtar qoıyp, erkin áńgimelese otyryp otbasy uǵymyna talqylaý júrgizdi. Sonymen qatar trenıń ótkizip, sol arqyly jaǵymsyz oılardan, qorqynysh, úreı sekildi ahýaldardan arylýǵa jáne jaǵymdy emosıalyq kóńil-kúı týdyrýǵa qajetti aqparattardy berdi. Ár oqýshymen erekshe qarym-qatynas ornatý arqyly psıhologıalyq ishki rezerv múmkindikterin kúsheıtip, ózin-ózi baqylaýdy damytýǵa úırete bildi. Qandaı jaǵdaı bolmasyn adamgershilik daǵdylardy, adamı qasıetti jańǵyrta bilý kerek degen túıin jasady.
Osylaısha erkin formatta órbigen mazmundy kezdesýge qatysqan jastar ata-babamyzdan qalǵan ulttyq rýhtan sýsyndap qaıtty. Iá, shyndyǵynda da jas urpaqtyń boıyna ulttyq ózekti daryta bilsek, álemdegi damyǵan elderdiń qatarynda terezemiz teń, eńsemiz bıikte turatyny haq.
