ۇلت ءۇمىتىن اقتاعان ەل ەرتەڭى جاستارعا دۇرىس تاربيە، تۋرا باعىت-باعدار بەرۋ ماسەلەسى الماتى ورتالىقتاندىرىلعان كىتىپحانا جۇيەسىنە قاراستى №20 بولىمشەسىنىڭ ۇستانعان باستى باعىتتارىنىڭ ءبىرى. الاش جۇرتىنىڭ اڭساعان تاۋەلسىزدىگى مەن بىرلىگى، ىنتىماعى مەن تاريحىنىڭ مۇراگەرى بولاتىن جاستارعا ارنالعان ناتيجەلى جوبالار مەن اۋقىمدى ءىس-شارالاردى كۇن تارتىبىنە ەنگىزىپ، سول باعىتتاعى جۇمىستارىن جانداندىرىپ كەلەدى. جۋىردا عانا كىتاپحانانىڭ «سەنىمەن بولاشاق» رەسپۋبليكالىق اتا-انالار قوعامدىق بىرلەستىگىنىڭ الماتى فيليالىمەن بىرلەسە ۇيىمداستىرعان «وتان وتباسىنان باستالادى» اتتى سەمينار-ترەنينگى سوزىمىزگە دالەل بولا الادى.
ەۆرازيالىق تەحنولوگيالىق كوللەدجىنىڭ ءى كۋرس ستۋدەنتتەرىنىڭ قاتىسۋىمەن وتكەن ءىس-شارا كىتاپحانا مەڭگەرۋشىسى لاۋرا ءماۋلىتشارىپ قىزىنىڭ كىرىسپە سوزىمەن اشىلدى. جاقىندا عانا اتالىپ وتكەن «وتباسى كۇنى» تۋرالى وي قورىتقان مەڭگەرۋشى باسقوسۋدىڭ باستى ماقساتى دا اتا-انانى سىيلاۋ، قادىرلەۋ، وتباسىلىق ومىرگە دايىن بولۋ، سوڭعى كەزدە بەلەڭ الىپ كەتكەن ءسۋيسيدتىڭ الدىن الۋ ەكەندىگىن اتاپ ءوتتى. «سەنىمەن بولاشاق» رقب وكىلى مەرۋەرت ماۋلەت قىزى وقۋ-بىلىممەن قاتار رۋحاني-تانىمدىق ساۋاتتىلىقتىڭ دا كەرەك ەكەنىن، ىشكى رۋحىڭ مىقتى بولسا قول جەتكىزەر جەڭىس كوپ بولارىن العا تارتتى. ال پسيحولوگ، كوۋچ-ترەنەر، «تاجىريبەلى پسيحولوگيا» رقب الماتى فيليالىنىڭ ديرەكتورى، «سەنىمەن بولاشاق» رقب فيليال ەكسپەرتى ايگۇل يسلامبەك قىزى بۇگىنگى زاماننىڭ بولمىسى مەن كەلبەتىنە ساي تانىم مەن تاربيە جايلى تۇسىنىك بەردى. جاستارعا ويلانتاتىن سۇراقتار قويىپ، ەركىن اڭگىمەلەسە وتىرىپ وتباسى ۇعىمىنا تالقىلاۋ جۇرگىزدى. سونىمەن قاتار ترەنينگ وتكىزىپ، سول ارقىلى جاعىمسىز ويلاردان، قورقىنىش، ۇرەي سەكىلدى احۋالداردان ارىلۋعا جانە جاعىمدى ەموسيالىق كوڭىل-كۇي تۋدىرۋعا قاجەتتى اقپاراتتاردى بەردى. ءار وقۋشىمەن ەرەكشە قارىم-قاتىناس ورناتۋ ارقىلى پسيحولوگيالىق ىشكى رەزەرۆ مۇمكىندىكتەرىن كۇشەيتىپ، ءوزىن-وزى باقىلاۋدى دامىتۋعا ۇيرەتە ءبىلدى. قانداي جاعداي بولماسىن ادامگەرشىلىك داعدىلاردى، ادامي قاسيەتتى جاڭعىرتا ءبىلۋ كەرەك دەگەن ءتۇيىن جاسادى.
وسىلايشا ەركىن فورماتتا وربىگەن مازمۇندى كەزدەسۋگە قاتىسقان جاستار اتا-بابامىزدان قالعان ۇلتتىق رۋحتان سۋسىنداپ قايتتى. ءيا، شىندىعىندا دا جاس ۇرپاقتىڭ بويىنا ۇلتتىق وزەكتى دارىتا بىلسەك، الەمدەگى دامىعان ەلدەردىڭ قاتارىندا تەرەزەمىز تەڭ، ەڭسەمىز بيىكتە تۇراتىنى حاق.
