Shymkent qalasy ákiminiń orynbasary Rýslan Berdenovke shuǵyl ota jasaldy, qazirgi tańda ómirine qaýip tónip turǵan joq. Bul týraly qalalyq Densaýlyq saqtaý basqarmasy málimdedi, dep habarlaidy Dalanews.kz.
Rýslan Berdenov qalalyq aýrýhanaǵa oq jaraqatymen jetkizilgen. Dárigerler tarapynan jedel túrde ota jasalyp, kóp qan joǵaltý toqtap, jaraqat saldarynan kelgen zaqymdar qalpyna keltirilgen. Ómirine tikelei qaýip joq.
“Degenmen naýqastyń jaǵdaiy aýyr, biraq turaqty. Ol dárigerlerdiń baqylaýynda, qajet barlyq meditsinalyq kómek kórsetilip jatyr”, — delingen resmi aqparatta.
Eske sala keteiik, 21 sáýir kúni Shymkent ákiminiń orynbasary Rýslan Berdenovke qastandyq jasaldy. Beiresmi derekterge súiensek, oǵan úsh ret oq atylǵan.
Oqiǵa kýágerleriniń jáne quqyq qorǵaý organdarynyń bergen aldyn ala málimetinshe, qala ákimdigine qarasty jaýapkershiligi shekteýli seriktestiktiń qyzmetkeri Berdenovke ańshy myltyǵymen oq atqan. Politsiia kúdiktini oqiǵa ornynda dereý ustaǵan.
Quqyq qorǵaý organdary oqiǵa boiynsha qylmystyq is qozǵap, tergeý amaldaryn bastap ketti. Qazirgi ýaqytta atalǵan jaitqa bailanysty Shymkent politsiia departamenti, Ishki ister ministrligi men «Respublica» partiiasy resmi pikir ázirlep jatyr. Aita keteiik, Rýslan Berdenov osy partiianyń múshesi.
Rýslan Berdenov Shymkent qalasy ákiminiń orynbasary qyzmetine biyl aqpan aiynda taǵaiyndaldy. Oqiǵanyń naqty sebebi men mán-jaiy ázirge belgisiz kúiinde qalyp otyr. Qazir qalada jaǵdai baqylaýǵa alynyp, kúsheitilgen qaýipsizdik sharalary engizildi.
Bul jaitqa qatysty Shymkent qalasynyń politsiia departamenti pikir bildirdi.
Politsiia málimetinshe, atalǵan qylmysty jasaǵan kúdikti ustalyp, ýaqytsha ustaý izoliatoryna qamaldy. Atalǵan fakti boiynsha qylmystyq is qozǵaldy. Oqiǵanyń barlyq mán-jaiy tergeý barysynda anyqtalady. Tergeý múddesine bailanysty ózge aqparat jariia etilmeidi.
