شىمكەنت قالاسى اكىمىنىڭ ورىنباسارى رۋسلان بەردەنوۆكە شۇعىل وتا جاسالدى، قازىرگى تاڭدا ومىرىنە ءقاۋىپ ءتونىپ تۇرعان جوق. بۇل تۋرالى قالالىق دەنساۋلىق ساقتاۋ باسقارماسى مالىمدەدى، دەپ حابارلايدى Dalanews.kz.
رۋسلان بەردەنوۆ قالالىق اۋرۋحاناعا وق جاراقاتىمەن جەتكىزىلگەن. دارىگەرلەر تاراپىنان جەدەل تۇردە وتا جاسالىپ، كوپ قان جوعالتۋ توقتاپ، جاراقات سالدارىنان كەلگەن زاقىمدار قالپىنا كەلتىرىلگەن. ومىرىنە تىكەلەي ءقاۋىپ جوق.
“دەگەنمەن ناۋقاستىڭ جاعدايى اۋىر، ءبىراق تۇراقتى. ول دارىگەرلەردىڭ باقىلاۋىندا، قاجەت بارلىق مەديسينالىق كومەك كورسەتىلىپ جاتىر”، — دەلىنگەن رەسمي اقپاراتتا.
ەسكە سالا كەتەيىك، 21 ءساۋىر كۇنى شىمكەنت اكىمىنىڭ ورىنباسارى رۋسلان بەردەنوۆكە قاستاندىق جاسالدى. بەيرەسمي دەرەكتەرگە سۇيەنسەك، وعان ءۇش رەت وق اتىلعان.
وقيعا كۋاگەرلەرىنىڭ جانە قۇقىق قورعاۋ ورگاندارىنىڭ بەرگەن الدىن الا مالىمەتىنشە، قالا اكىمدىگىنە قاراستى جاۋاپكەرشىلىگى شەكتەۋلى سەرىكتەستىكتىڭ قىزمەتكەرى بەردەنوۆكە اڭشى مىلتىعىمەن وق اتقان. پوليسيا كۇدىكتىنى وقيعا ورنىندا دەرەۋ ۇستاعان.
قۇقىق قورعاۋ ورگاندارى وقيعا بويىنشا قىلمىستىق ءىس قوزعاپ، تەرگەۋ امالدارىن باستاپ كەتتى. قازىرگى ۋاقىتتا اتالعان جايتقا بايلانىستى شىمكەنت پوليسيا دەپارتامەنتى، ىشكى ىستەر مينيسترلىگى مەن «Respublica» پارتياسى رەسمي پىكىر ازىرلەپ جاتىر. ايتا كەتەيىك، رۋسلان بەردەنوۆ وسى پارتيانىڭ مۇشەسى.
رۋسلان بەردەنوۆ شىمكەنت قالاسى اكىمىنىڭ ورىنباسارى قىزمەتىنە بيىل اقپان ايىندا تاعايىندالدى. وقيعانىڭ ناقتى سەبەبى مەن ءمان-جايى ازىرگە بەلگىسىز كۇيىندە قالىپ وتىر. ءقازىر قالادا جاعداي باقىلاۋعا الىنىپ، كۇشەيتىلگەن قاۋىپسىزدىك شارالارى ەنگىزىلدى.
بۇل جايتقا قاتىستى شىمكەنت قالاسىنىڭ پوليسيا دەپارتامەنتى پىكىر ءبىلدىردى.
پوليسيا مالىمەتىنشە، اتالعان قىلمىستى جاساعان كۇدىكتى ۇستالىپ، ۋاقىتشا ۇستاۋ يزولياتورىنا قامالدى. اتالعان فاكتى بويىنشا قىلمىستىق ءىس قوزعالدى. وقيعانىڭ بارلىق ءمان-جايى تەرگەۋ بارىسىندا انىقتالادى. تەرگەۋ مۇددەسىنە بايلانىستى وزگە اقپارات جاريا ەتىلمەيدى.
