21 sáýirde Shymkentte Rýslan Berdenovke shabýyl jasaldy. Tosyn oqiǵadan keiin kúdiktiniń áieli alǵash ret málimdeme jasady,- dep habarlaidy Dalanews.kz.
Lýiza Aldanova bul týraly áleýmettik jelide jazdy. Ol qalyń kópshilikke qoldaý kórsetkeni úshin alǵys aitty.
"Ótken bir ai bizdiń otbasymyz úshin de aýyr synaq bolǵanyn jetkizgim keledi. Endi ǵana esimizdi jiyp, óz-ózimizge kelip jatqan jaiymyz bar. Árbir minýt, ár saǵat, ár táýlik ýaiymdaýmen boldyq, japa shekken Rýslan Berdenov myrzanyń amandyǵyn tiledik. Jýyrda ǵana em-domyn alyp, aýrýhanadan úiine oralǵanyn estidik. Endi erterek aiyǵyp, elge qyzmetin jalǵastyrýyn tileimiz", - dedi ol.
Ol jubaiynyń shalys basqanyn aityp, muny synaq dep qabyldaitynyn jetkizdi.
"Meniń joldasym Ernardy, meni jáne bizdiń ata-analarymyzdy jaqsy biletin adamdar, tanystarymyz, týystarymyz bizdiń qandai qarapaiym, otbasyn birinshi orynǵa qoiatyn jandar ekenimizdi de biledi dep oilaimyn. Sonymen qatar, olardy bizdiń jat áreketterge, jaman isterge barmaitynymyzǵa da senimdi dep bilemin. Dese de, Ernarymyz jaza basqan eken, qatelesken eken... Men bul jaǵdaidy taǵdyrdyń synaǵy dep qabyldap, barynsha sabyrmen qarap otyrmyn. Barlyǵyn Allanyń qolyna tapsyrdym. Ana retinde, tek basymyzdyń amandyǵyn, baýyrymyzdyń bútindigin tileimin", - deidi ol.
Lýiza Aldanova el ishinde taraǵan qaýesetke pikir bildirdi.
"Osy jaǵdaiǵa meniń de qatysym bar degen bastapqyda taraǵan qaýesetti úzildi-kesildi joqqa shyǵaramyn. Ata-anadan kórgen tárbiem, boiǵa sińgen imanym mundai arsyz qylyqqa attap bastyrmaityny aidan anyq", - dep túiindedi ol.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
Al Densaýlyq saqtaý ministrligi málimetinshe, Rýslan Berdenovke operatsiia jasalǵan, ómirine qaýip joq.
Kásipkerden belgili shendige ainalý joly: Berdenov týraly ne belgili?
Rýslan Berdenov - Shymkenttiń týmasy. Ol 1985 jyly 6 naýryzda Shymkent qalasynda dúniege kelgen. 2006 jyly menedjment mamandyǵy boiynsha ál-Farabi atyndaǵy Qazaq ulttyq ýniversitetin bitirgen. 2009 jyly KIMEP ýniversitetin Iskerlik basqarý magistri (MBA) dárejesimen bitirdi.
Biraz ýaqyt jeke kompaniialarda jumys istegen, atap aitsaq:
- Eńbek jolyn 2005 jyly "Almaty qus" AAQ ("Seimar" toby) kompaniiasynyń bólshek saýda direktory qyzmetinen bastady.
- 2007 jylǵy aqpan - 2010 jylǵy shilde Procter & Gamble kompaniiasynyń bas logistikalyq úilestirýshisi.
- 2010 jylǵy shilde - 2012 jylǵy qarasha Eastcomtrans JShS jyljymaly quramdy jaldaý bóliminiń bastyǵy.
- 2012 jylǵy qarasha - 2018 jylǵy mamyr "Aq niet" JShS bas direktory.
- 2018 jylǵy qarasha - 2019 jylǵy sáýir "Aq niet" JShS baiqaý keńesiniń múshesi.
- 2019 jylǵy sáýir - 2023 jylǵy naýryz Aq niet Group baiqaý keńesi tóraǵasynyń orynbasary.
Eki jyl buryn Berdenovtiń saiasi arenadaǵy karerasy bastaldy. 2023 jylǵy 29 naýryzdan bastap Respublica partiiasynyń partiialyq tizimi boiynsha VIII sailanǵan Qazaqstan Respýblikasy Parlamenti Májilisiniń depýtaty, Qarjy jáne biýdjet komitetiniń múshesi boldy.
Májilis minberinde Berdenovtiń esimi býkmekerlermen kúres arqyly este qaldy. Keiin tipti bul másele sotqa deiin jetti. Artynsha sot depýtat Rýslan Berdenovtiń ústinen shaǵymdanǵan býkmekerlik keńselerdiń talabyn qanaǵattandyrýdan bas tartty. Odan soń nashaqorlyq pen esirtki biznesine qarsy kúreske baǵyttalǵan bes jyldyq keshendi josparǵa ózgerister engizý qajet ekenin málimdedi. Bir kezderi QTJ-ǵa da shúiligip, kompaniia qyzmetine alańdaýshylyq bildirip, sybailas jemqorlyq tetikteri jáne milliardtaǵan shyǵyndar týraly aitty.
Eki jylǵa jýyq depýtattyq qyzmet atqarǵan ol biyl aqpanda Shymkent qalasy ákiminiń orynbasary bolyp taǵaiyndaldy.
