Rýslan Berdenovke jasalǵan qastandyq týraly is boiynsha keshegi sot otyrysynda sýdia Ábinur Qarabaev jýrnalist Botagóz Omarovaǵa tilin shyǵarǵan, dep habarlaidy Dalanews.kz.
Botagóz Omarova sot zalyndaǵy videony Facebook paraqshasynda jariialady. Jelide bul jait qyzý talqylanyp jatyr.
Sýdiaǵa qatysty tekseris taǵaiyndaldy
"Tóraǵalyq etýshi sýdia Ábinur Qarabaevtyń Shymkent qalasy ákiminiń orynbasaryna jasalǵan qastandyq týraly qylmystyq isti qaraý kezindegi áreketi Sýdia ádebi kodeksi buzylýyna bailanysty tekseriledi", - dep jaýap bergen sottyń baspasóz qyzmeti ókili.
Buǵan deiingi jaǵdai
Eske salaiyq, buǵan deiin Rýslan Berdenov sotqa kelýge mindettelgeni habarlandy. Sot otyrysynda sýdia Ábinur Qarabaev Rýslan Berdenovti 6 tamyzǵa josparlanǵan negizgi sot protsesine mindetti túrde qatysýǵa shaqyrdy.
Sebebi Rýslan Berdenov aldyn ala tyńdaýǵa ózi kelmegen edi. Onyń ókili Rýslan Berdenov em qabyldap jatqanyn málimdedi.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Artynsha kúdikti ustalyp, ýaqytsha ustaý izoliatoryna qamaldy, bul derek boiynsha qylmystyq is qozǵaldy.
Bul is boiynsha basty kúdikti - Ernar Jiembai. Ashyq formatta ótken aldyn ala tyńdaý kezinde sýdia Jiembaidyń sot protsesi barysynda ózin túsirýge qarsy ekenin jetkizdi.
