Astanada «Dala Qyrandary» jastar qoǵamdyq birlestiginiń ókilderi «QazAvtoJol» ulttyq kompaniiasynyń ortalyq keńsesi aldynda aktsiia ótkizip, respýblikalyq mańyzy bar joldardaǵy qaýipsizdik máselesin kóterdi, dep habarlaidy dalanews.kz.
Qoǵam belsendileri jol-kólik oqiǵalarynyń aldyn alý úshin jol infraqurylymyna qoiylatyn talaptardy kúsheitip, adam ólimine ákelgen jol apattary boiynsha ulttyq kompaniia basshylyǵynyń jaýapkershiligin qarastyrý qajet ekenin málimdedi.
Jarty jylda 807 adam qaza tapqan
Uiym málimetinshe, 2026 jyldyń alǵashqy alty aiynda Qazaqstan joldarynda 807 adam kóz jumǵan.
Belsendilerdiń pikirinshe, joldardyń qaýipti ýchaskelerinde qorshaýlar men qaýipsizdik elementteriniń jetkiliksiz bolýy kóptegen qaiǵyly oqiǵalarǵa sebep bolyp otyr.
Atap aitqanda, bólgish qorshaýlardyń joqtyǵy qarsy baǵyttaǵy kólikterdiń soqtyǵysý qaýpin arttyrsa, arnaiy qorshaýlardyń bolmaýy jabaiy jáne úi janýarlarynyń jolǵa shyǵýyna jaǵdai jasaidy.
Qara eskertý belgileri ornatylǵan
«Dala Qyrandary» músheleri júrgizýshilerdiń nazaryn qaýipti ýchaskelerge aýdarý maqsatynda keibir trassalarǵa arnaiy qara tústi eskertý belgilerin ornata bastaǵanyn habarlady.
Belsendiler mundai bastama jańa jol apattarynyń aldyn alýǵa kómektesedi dep esepteidi.
Eki negizgi talap qoiyldy
Qoǵamdyq birlestik jol qaýipsizdigin qamtamasyz etý júiesine qatysty eki usynys jariialady.
Birinshiden, adam ólimimen aiaqtalǵan árbir jol apatynan keiin joldyń jaǵdaiyna táýelsiz saraptama júrgizý qajet dep sanaidy. Saraptama barysynda jol belgileri, jolaqtar, qorshaýlar jáne basqa da qaýipsizdik elementteri tekserilýi tiis.
Ekinshiden, belsendiler ólimmen aiaqtalǵan jol-kólik oqiǵalary boiynsha qylmystyq isterge «QazAvtoJoldy» avtomatty túrde tarap retinde tartýdy zańnamalyq deńgeide bekitýdi usyndy.
Aktsiialar jalǵasady
«Dala Qyrandary» ókilderi jol qaýipsizdigine qatysty júieli ózgerister engizilgenge deiin respýblikalyq joldarda bolǵan árbir iri qaiǵyly oqiǵadan keiin osyndai aktsiialardy jalǵastyrýǵa nietti ekenin málimdedi.
