Астанада «Дала Қырандары» жастар қоғамдық бірлестігінің өкілдері «ҚазАвтоЖол» ұлттық компаниясының орталық кеңсесі алдында акция өткізіп, республикалық маңызы бар жолдардағы қауіпсіздік мәселесін көтерді, деп хабарлайды dalanews.kz.
Қоғам белсенділері жол-көлік оқиғаларының алдын алу үшін жол инфрақұрылымына қойылатын талаптарды күшейтіп, адам өліміне әкелген жол апаттары бойынша ұлттық компания басшылығының жауапкершілігін қарастыру қажет екенін мәлімдеді.
Жарты жылда 807 адам қаза тапқан
Ұйым мәліметінше, 2026 жылдың алғашқы алты айында Қазақстан жолдарында 807 адам көз жұмған.
Белсенділердің пікірінше, жолдардың қауіпті учаскелерінде қоршаулар мен қауіпсіздік элементтерінің жеткіліксіз болуы көптеген қайғылы оқиғаларға себеп болып отыр.
Атап айтқанда, бөлгіш қоршаулардың жоқтығы қарсы бағыттағы көліктердің соқтығысу қаупін арттырса, арнайы қоршаулардың болмауы жабайы және үй жануарларының жолға шығуына жағдай жасайды.
Қара ескерту белгілері орнатылған
«Дала Қырандары» мүшелері жүргізушілердің назарын қауіпті учаскелерге аудару мақсатында кейбір трассаларға арнайы қара түсті ескерту белгілерін орната бастағанын хабарлады.
Белсенділер мұндай бастама жаңа жол апаттарының алдын алуға көмектеседі деп есептейді.
Екі негізгі талап қойылды
Қоғамдық бірлестік жол қауіпсіздігін қамтамасыз ету жүйесіне қатысты екі ұсыныс жариялады.
Біріншіден, адам өлімімен аяқталған әрбір жол апатынан кейін жолдың жағдайына тәуелсіз сараптама жүргізу қажет деп санайды. Сараптама барысында жол белгілері, жолақтар, қоршаулар және басқа да қауіпсіздік элементтері тексерілуі тиіс.
Екіншіден, белсенділер өліммен аяқталған жол-көлік оқиғалары бойынша қылмыстық істерге «ҚазАвтоЖолды» автоматты түрде тарап ретінде тартуды заңнамалық деңгейде бекітуді ұсынды.
Акциялар жалғасады
«Дала Қырандары» өкілдері жол қауіпсіздігіне қатысты жүйелі өзгерістер енгізілгенге дейін республикалық жолдарда болған әрбір ірі қайғылы оқиғадан кейін осындай акцияларды жалғастыруға ниетті екенін мәлімдеді.
