Belgiiada Farabi ortalyǵy ashylady
Áńgime barysynda rektor oqý orny tarihyna toqtalyp, QazUÝ-dyń uly filosof-ǵalym Ábý Nasyr ál-Farabi esimimen atalatyn álemdegi birden-bir ýniversitet ekenin atap ótti.
– Bul biz úshin erekshe maqtanysh ári úlken jaýapkershilik. Uly oishyl zamanynan beri 11 ǵasyr ótse de, Ál-Farabi ilimi búgingi qoǵamda da máni men maǵynasyn joiǵan joq, degen rektor ǵulama ǵalymnyń eńbekterin jan-jaqty zertteý, taldaý, keiingi jastarǵa nasihattaý baǵytynda atqarylyp jatqan aýqymdy sharalardy tilge tiek etti.
Ýniversitette 1993 jyly qurylǵan Ál-Farabi ortalyǵy farabitaný men jalpy qazaqstandyq ǵylymnyń damýyna qomaqty úles qosyp keledi. Ortalyq jyl ótken saiyn sheteldik zertteý ortalyqtarymen bailanysty nyǵaityp, Farabi muralaryn túpnusqa – arab tilinen qazaq tiline aýdaryp, arnaiy kitaptar shyǵarýda. Ábý Nasyr ál-Farabi babamyzdyń 1150 jyldyq mereitoiyna orai álem ǵalymdarynyń qatysýymen konferentsiialar uiymdastyryldy.
Sondai-aq ýniversitet basshysy QazUÝ bazasynda halyqaralyq farabitanýshylar ortalyǵyn qurý josparlanǵanyn habarlap, ózara yntymaqtastyqqa shaqyrdy.
Filosofiia doktory, belgili tarihshy-arabtanýshy Kýrt Dibov óz kezeginde Ábý Nasyr ál-Farabi eńbekterin birlesip zertteýge úlken yqylas tanytty. Taiaý Shyǵystaǵy qaqtyǵystar taqyrybyna kóptegen maqalalar men kitaptar arnaǵan sarapshy-maman Qazaqstannyń jetekshi ýniversitetiniń ǵalymdarymen yntymaqtastyqqa asa múddeli ekenin jetkizdi.
Kezdesýde taraptar Belgiiada Ál-Farabi ortalyǵyn ashý men tiimdi áriptestiktiń mańyzdy suraqtaryn talqylap, aldaǵy naqty qadamdardy anyqtady. Ýniversiet basshysy sóz sońynda sheteldik qonaqtyń zertteý jumystaryna jan-jaqty qoldaý kórsetýge daiyn ekenin jetkizdi.
QazUÝ-ǵa sapary aiasynda Kýrt Dibof Ál-Farabi murajaiy men kitaphanasynyń sirek kitaptar qoryn aralap, ýniversitet kampýsymen tanysty. Sonymen qatar Ál-Farabi ortalyǵynda Qazaqstannyń jetekshi farabitanýshylary jáne filosoftarymen júzdesti.
Basqosýǵa filosofiia jáne saiasattaný fakýltetiniń dekany, Ál-Farabi ortalyǵynyń direktory Bekjan Meiirbaev, filosofiia ǵylymdarynyń doktory, professor Jaqypbek Altaev, QR UǴA korrespondent-múshesi, QR BǴM Ǵylym komiteti Filosofiia, saiasattaný jáne dintaný institýtynyń professory Natalia Seitahmetova men ǵylymi qyzmetkeri Ǵaliia Qurmanǵalieva, QazUÝ-dyń filosofiia jáne saiasattaný fakýlteti dintaný jáne mádeniettaný kafedrasynyń meńgerýshisi Ainur Qurmanalieva syndy belgili ǵalymdar qatysty. Mamandar otandyq farabitaný salasynyń joǵary jetistikterimen bólisip, bolashaqtaǵy mindetter jaily keńinen sóz qozǵady.
