«Abaqtydan shyqqan ýaqytta qazaq bolǵan soń, aǵaıyn-týys, kórshi-qolań shaqyryp shaı berip jatty.
Buryn istes, qyzmettes bolǵandardyń azamattardyń ishinde alǵashqy bop úıine shaqyrǵan – Qasym-Jomart Kemeluly edi. Ol tusta Toqaev Senatty basqaryp turdy.
Túrmeden shyǵyp, ári-sári kúıde júrgen meni úıine shaqyryp bir sháýgim sháıin berdi. Keshki saǵat 6-7-lerde ústel basyna otyrǵan bizder tún ortasyna deıin áńgimeniń tıegin aǵyttyq.
Sháı ústinde saıasat, memlekettik máseleler, prezıdent, úkimet qabyldap jatqan sheshimderge qatysty pikirimdi surady. Shyǵaryp salarda «Jáke, osy aıtqandaryńdy qaǵazǵa túsirip bershi» dedi.
Eki-úsh kún ýaqyt bólip, saıası-qoǵamı konsepsıalardan turatyn 20-30 paraq ázirledim.
Ara-kidik shaqyryp turady. «Seniń jazǵandaryńdy áli tastamaı oqyp júrmin» dep aıtady. Ol, árıne, meniń kóńilimdi aýlap aıtqan bolýy múmkin.
Degenmen de ondaı nárseler maǵan kúsh-qýat berip júrdi desem artyq aıtqandyq emes», – dedi Qulekeev «Suraýy bar» Youtube arnasyna bergen suhbatynda.
Qulekeev Toqaevty nelikten "dosym" dep ataı almaıtynyn túsindirdi.
"Etıkalyq turǵydan prezıdentti "dosym" dep aıtý durys emes. Eger ol kisi aıtatyn bolsa men úshin úlken maqtanysh bolar edi. Sebebi qyzmeti tómen adamnyń joǵary qyzmettegi adamǵa dosym edi degeni jaraspaıdy. Jaqsy azamat, men ony syılaımyn dese, sol maǵan jetkilikti", - deıdi ol.
Aıta ketelik, Jaqsybek Qulekeev «Qazaqstan temir joly» kompanıasyn basqarǵan tusta, 2008 jyly iri kólemde para aldy degen aıyppen qamaýǵa alynǵan. Qyzmet babyn asyra paıdalanǵany úshin kináli dep tanylyp, 3 jylǵa bas bostandyǵynan aıyrylǵan.
Sáýir aıynda memleket basshysy Qasym-Jomart Toqaev Aqordada belgili ekonomıs Jaqsybek Qulekeevti qabyldaǵanyn habarlaǵanbyz. Onda Jaqsybek Qulekeev Qasym-Jomart Toqaevqa elimizdiń áleýmettik-ekonomıkalyq damý perspektıvalary týraly óziniń kózqarasyn aıtqan.
