Jýyrda Qazaqstan úkimeti biýrokratiiany aýyzdyqtaýǵa baǵyttalǵan eki mańyzdy bastamany júzege asyrýǵa kiristi. Ekeýi de Prezidenttiń tapsyrmasy boiynsha qolǵa alynyp, Prezident Ákimshiligi men Premer-ministrdiń tikelei baqylaýyna alynǵan. Jemqorlardy "jeminen" qaǵatyn bul jobalar týraly qarjyger-maman Oljas Qudaibergenov keńinen aityp berdi, dep habarlaidy Dalanews.kz.
Sóz etilip otyrǵan bastamalar Ulttyq Akselelator jobasy men tejeýshi biýdjet jobasy dep atalady.
"Ulttyq Akselelator jobasy Tsifrlyq damý, innovatsiialar jáne aeroǵarysh ónerkásibi ministrligi arqyly júzege asyrylýda. Jobanyń maqsaty óte qarapaiym — kúrdeli emes bir mindetti alyp, ony 100 kún ishinde oryndaý qajet. Osy merzimde árbir biýrokratiialyq kedergi jiti zerttelip, artyq rásimder anyqtalyp, ony joiý máseleleri zerdelenedi. Bul bastama memlekettik organdardaǵy qajetsiz biýrokratiiany qysqartýǵa baǵyttalǵan", dep jazady qarjyger-maman Oljas Qudaibergenov Facebook-tegi paraqshasynda.
Al tejeýshi biýdjet jobasy Qarjy ministrliginiń bastamasymen júzege asyrylyp jatyr. Alǵashqy kezeńde tórt memlekettik organ iriktelgen: eki ministrlik (Sý resýrstary ministrligi jáne Mádeniet jáne sport ministrligi) jáne eki óńir (Batys Qazaqstan oblysy men Qaraǵandy oblysy).
"Eger joba sátti júzege asyrylsa, bul tásil barlyq memlekettik organdarǵa engiziletin bolady. Bul jobadaǵy basty ádis — Singapýrdyń tájiribesimen bizdiń júieni salystyryp, artyq-tyrtyq rásimderdi anyqtaý. Zańǵa qaishy kelmeitinderiniń kózin birden joiý, al qalǵanyn alyp tastaý úshin bir-eki jyl ýaqyt beriledi. Alaida, menińshe, osy jobalardy iske asyrý barysynda eki mańyzdy táýekel bar. Birinshisi — qoldanystaǵy biýrokratiianyń osy bastamalardyń júzege asyrylýyn baiaýlatyp, olardyń mańyzyn tómendetý qaýpi. Eger osyndai jaǵdai oryn alsa, onda ekinshi qaýiptiń basy qyltiiady, iaǵni qaǵaz júzinde bári oryndalǵanymen, is júzinde eshqandai ózgeris bolmaidy. Kóbisi, negizinen bylai oilaidy: "Eger Prezident nemese Premer-ministr tapsyrma berse, ol mindetti túrde oryndalady" dep. Biraq bul da keide múmkin bolmai jatady", - deidi maman.
Ol, shyndyǵynda, kez kelgen júieli ózgerister, ásirese biýrokratiiany qysqartýǵa baǵyttalǵan sharalar, ókilettikterdi qaita bólýdi talap etetinin basa aitady.
"Álbette, bul jaǵdaidan ziian shegetin taraptar ózgeristerge kedergi jasaýǵa barynsha tyrysady, túrli syltaý aityp, jobalardyń júzege asýyn keshiktirýi múmkin. "Biz Singapýr emespiz qoi" degen jaltarý sózden bastap, "ózgeris jasaýǵa áli erte" degendi dáleldep, basshylyqty soǵan sendirýge tyrysady. Sonymen qatar, taǵy bir kózge kórine bermeitin kedergi bar: — eldi "qaýip-qaterlerden qorǵaýdy" óz mindeti sekildi sanap alǵan sheneýnikterdiń is-áreketi. Mysaly, memlekettik satyp alýlar júiesin ońtailandyrý kerek bolady delik, mundaida álgi diversanttar údere kóterilip: "Óitse bárin tonaidy" degen syltaýmen protsesterdi, kerisinshe kúrdelendirýge tyrysady. Al shyntýaitynda, tabysty damyǵan elderdiń barlyǵy memlekettik satyp alýlar salasyna ońtailandyrylǵan, qarapaiym júielerdi engizgennen keiin ǵana jemqorlyqty azaita aldy", - deidi ol.
Sondai-aq maman memlekettik satyp alýlar zańnamasyn jemqorlyqpen kúrestiń basty quralyna ainaldyrý qate, sebebi mundaida barlyǵy jaýapkershilikten qasha bastaidy nemese bul memlekettik qyzmetkerlerdiń kez kelgen áreketin jemqorlyq dep qarastyrýǵa ákelip soǵýy múmkin ekenin aitady.
"Shyndyǵynda, jemqorlyqpen kúres úshin áldeqaida tiimdi quraldar bar, ásirese bul rette jappai deklaratsiialaý júiesin engizý mańyzdy ról atqarady. Qalai degenmen de osy bastamalar biýrokratiiany jeńedi me, álde kerisinshe biýrokratiia onyń mańyzyn joiady ma, bul jaǵy aldaǵy jarty jylda belgili bolyp qalady", dep sózin túiindeidi Oljas Qudaibergenov.
