Qazaqstan Ortalyq Aziiadaǵy sheteldik investitsiialardyń shamamen 70%-yn tartyp, óńirdiń negizgi investitsiialyq ortalyǵyna ainaldy, dep habarlaidy dalanews.kz.
Úkimettiń málimetinshe, 2025 jyldyń qorytyndysynda elimizdiń jalpy ishki ónimi 6,5%-ǵa ósip, 300 mlrd dollardan asty. Al jinaqtalǵan taza tikelei sheteldik investitsiia kólemi 150 mlrd dollardan asyp, bul kórsetkish Ortalyq Aziiaǵa tartylǵan investitsiialardyń shamamen 70%-yn qurady.
2026 jyly Qazaqstanǵa 25 mlrd dollardan astam tikelei sheteldik investitsiia tartý jáne negizgi kapitalǵa salynatyn investitsiia kólemin 31,5 trln teńgege jetkizý mindeti qoiylǵan.
Úkimet janyndaǵy Investitsiialyq ahýaldy jaqsartý jónindegi keńeste Qazaqstannyń halyqaralyq biznes úshin negizgi artyqshylyqtaryn odan ári kúsheitý máseleleri qaraldy. Atap aitqanda, jańa Konstitýtsiia kúshine engennen keiin quqyqtyq júieni jetildirý, memlekettik retteýdiń boljamdylyǵyn qamtamasyz etý, investorlarmen turaqty dialog ornatý jáne zamanaýi tsifrlyq ortany damytý máselelerine basymdyq berildi.
Sondai-aq tsifrlyq ekonomika men jasandy intellekt baǵytyndaǵy jobalardy damytýǵa erekshe nazar aýdarylyp otyr. Qazaqstanda Tsifrlyq kodeks, jasandy intellekt jáne kiberqaýipsizdik týraly zańdar qabyldanyp, Digital Qazaqstan strategiiasy iske asyrylýda. Sonymen qatar derekterdi óńdeý infraqurylymy damyp, jasandy intellekt salasyndaǵy aýqymdy jobalar qolǵa alynǵan.
Úkimettiń baǵalaýynsha, bul sharalar joǵary qosylǵan quny bar jańa óndiristerdi damytýǵa múmkindik beretin zamanaýi investitsiialyq ekojúieni qalyptastyrady. Osylaisha, Qazaqstan uzaq merzimdi investitsiialar úshin ashyq ári senimdi alań retindegi ustanymyn saqtap qalýdy kózdep otyr.
