Tyvada birneshe kún boiy izdestirilgen eki oqýshy qyzdyń denesi tabyldy. Enisei ózeninen shyǵarylǵan balalardyń máiitin ata-analary tanydy, dep habarlaidy dalanews.kz.
Bul týraly Resei Tergeý komitetiniń Tyva Respýblikasy boiynsha tergeý basqarmasy habarlady.
Vedomstvo málimetinshe, qazir tergeýshiler qyzdardyń jeke basyn anyqtaý rásimin júrgizgen. Sonyń nátijesinde ózennen tabylǵan eki balanyń da 1 shildede joǵalyp ketken 12 jastaǵy qyzdar ekeni rastaldy. Olardyń óliminiń naqty sebebin anyqtaý úshin sot-meditsinalyq saraptama taǵaiyndaldy.
Tyva basshysy Vladislav Hovalyg qaza tapqan balalardyń otbasylaryna kóńil aityp, olarǵa qajetti kómek kórsetiletinin málimdedi.
"Bul qaiǵyny sózben jetkizý múmkin emes. Búgin búkil Tyva sizdermen birge qaiǵyryp otyr. Otbasylarǵa materialdyq kómek te, psihologiialyq qoldaý da kórsetiledi", – dedi ol.
Sonymen qatar óńir basshysy turǵyndardy áleýmettik jelide túrli boljam taratyp, qaiǵyly oqiǵany talqylai bermeýge shaqyrdy.
Eske salaiyq, eki qyz 1 shilde kúni keshke úiden shyǵyp ketkennen keiin habarsyz qalǵan. Keiin olardyń Enisei ózeni jaǵalaýynda bolýy múmkin ekeni aityldy. Damba mańynan qyzdardyń uialy telefondary men aiaq kiimderi tabylǵan edi.
Osy derek boiynsha qylmystyq is qozǵalyp, prokýratýra tekseris bastaǵan.
