Qazaq ádebieti aýyr qazaǵa dýshar boldy. Aqyn, aýdarmashy, Qazaqstannyń mádeniet qairatkeri, Qazaqstan Jazýshylar odaǵynyń múshesi Nurtas Isabaev 72 jasqa qaraǵan shaǵynda dúnieden ótti, dep habarlaidy dalanews.kz.
Nurtas Isabaev 1954 jyly 13 qarashada Qyzylorda oblysy Jańaqorǵan aýdanynda dúniege kelgen. Ol Qazaqstan Jazýshylar odaǵy syilyǵynyń jáne Oraz Jandosov qory syilyǵynyń laýreaty atanǵan. Sondai-aq Qazaqstan Respýblikasy Mádeniet jáne aqparat ministrliginiń «Mádeniet qairatkeri» tósbelgisimen marapattalǵan.
Qalamger Qazaqstan Respýblikasy Prezidentiniń Memlekettik stipendiiasynyń iegeri bolǵan. Sonymen qatar ádebiet pen mádeniet salasyna sińirgen eńbegi úshin «Qurmet» ordenimen marapattalǵan.
Nurtas Isabaev eńbek jolyn orta mektepti bitirgennen keiin aýdandyq gazette korrektor bolyp bastaǵan. Keiin Máskeý qalasyndaǵy M.Gorkii atyndaǵy Ádebiet institýtynda bilim alyp, ony 1982 jyly támamdady.
Aqynnyń alǵashqy jyr jinaǵy «Bastaý» degen ataýmen 1980 jyly jaryq kórdi. Odan keiin «Ómirdi súiý», «Ulylyqpen syrlasý», «Qimaimyn seni», «Ómirge qushtarlyq» jáne basqa da poeziialyq kitaptary oqyrmanǵa jol tartty.
Nurtas Isabaevtyń shyǵarmalary qazaq poeziiasyndaǵy syrshyldyq, ómirge qushtarlyq, adam bolmysy men rýhani izdenis taqyryptarymen erekshelendi. Onyń birqatar óleńderi orys tilindegi «Razbeg» atty ujymdyq jinaqqa engen.
Qalamger aýdarma salasynda da ónimdi eńbek etti. Ol orys aqyny Aleksandr Tvardovskiidiń shyǵarmalaryn qazaq tiline aýdaryp, ulttyq aýdarma óneriniń damýyna úles qosty.
Qazaqstan Jazýshylar odaǵynyń basqarmasy marqumnyń týǵan-týystary men jaqyndaryna, áriptesteri men oqyrman qaýymǵa qaiǵyra kóńil aitty.
Nurtas Isabaevtyń qazaq ádebieti men rýhaniiatyna qosqan eńbegi el esinde saqtalady.
