جۋىردا قازاقستان ۇكىمەتى بيۋروكراتيانى اۋىزدىقتاۋعا باعىتتالعان ەكى ماڭىزدى باستامانى جۇزەگە اسىرۋعا كىرىستى. ەكەۋى دە پرەزيدەنتتىڭ تاپسىرماسى بويىنشا قولعا الىنىپ، پرەزيدەنت اكىمشىلىگى مەن پرەمەر-مينيستردىڭ تىكەلەي باقىلاۋىنا الىنعان. جەمقورلاردى "جەمىنەن" قاعاتىن بۇل جوبالار تۋرالى قارجىگەر-مامان ولجاس قۇدايبەرگەنوۆ كەڭىنەن ايتىپ بەردى، دەپ حابارلايدى Dalanews.kz.
ءسوز ەتىلىپ وتىرعان باستامالار ۇلتتىق اكسەلەلاتور جوباسى مەن تەجەۋشى بيۋدجەت جوباسى دەپ اتالادى.
"ۇلتتىق اكسەلەلاتور جوباسى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى ارقىلى جۇزەگە اسىرىلۋدا. جوبانىڭ ماقساتى وتە قاراپايىم — كۇردەلى ەمەس ءبىر مىندەتتى الىپ، ونى 100 كۇن ىشىندە ورىنداۋ قاجەت. وسى مەرزىمدە ءاربىر بيۋروكراتيالىق كەدەرگى ءجىتى زەرتتەلىپ، ارتىق راسىمدەر انىقتالىپ، ونى جويۋ ماسەلەلەرى زەردەلەنەدى. بۇل باستاما مەملەكەتتىك ورگاندارداعى قاجەتسىز بيۋروكراتيانى قىسقارتۋعا باعىتتالعان"، دەپ جازادى قارجىگەر-مامان ولجاس قۇدايبەرگەنوۆ Facebook-تەگى پاراقشاسىندا.
ال تەجەۋشى بيۋدجەت جوباسى قارجى مينيسترلىگىنىڭ باستاماسىمەن جۇزەگە اسىرىلىپ جاتىر. العاشقى كەزەڭدە ءتورت مەملەكەتتىك ورگان ىرىكتەلگەن: ەكى مينيسترلىك (سۋ رەسۋرستارى مينيسترلىگى جانە مادەنيەت جانە سپورت مينيسترلىگى) جانە ەكى ءوڭىر (باتىس قازاقستان وبلىسى مەن قاراعاندى وبلىسى).
"ەگەر جوبا ءساتتى جۇزەگە اسىرىلسا، بۇل ءتاسىل بارلىق مەملەكەتتىك ورگاندارعا ەنگىزىلەتىن بولادى. بۇل جوباداعى باستى ءادىس — سينگاپۋردىڭ تاجىريبەسىمەن ءبىزدىڭ جۇيەنى سالىستىرىپ، ارتىق-تىرتىق راسىمدەردى انىقتاۋ. زاڭعا قايشى كەلمەيتىندەرىنىڭ كوزىن بىردەن جويۋ، ال قالعانىن الىپ تاستاۋ ءۇشىن بىر-ەكى جىل ۋاقىت بەرىلەدى. الايدا، مەنىڭشە، وسى جوبالاردى ىسكە اسىرۋ بارىسىندا ەكى ماڭىزدى تاۋەكەل بار. ءبىرىنشىسى — قولدانىستاعى بيۋروكراتيانىڭ وسى باستامالاردىڭ جۇزەگە اسىرىلۋىن باياۋلاتىپ، ولاردىڭ ماڭىزىن تومەندەتۋ ءقاۋپى. ەگەر وسىنداي جاعداي ورىن السا، وندا ەكىنشى ءقاۋىپتىڭ باسى قىلتيادى، ياعني قاعاز جۇزىندە ءبارى ورىندالعانىمەن، ءىس جۇزىندە ەشقانداي وزگەرىس بولمايدى. كوبىسى، نەگىزىنەن بىلاي ويلايدى: "ەگەر پرەزيدەنت نەمەسە پرەمەر-مينيستر تاپسىرما بەرسە، ول مىندەتتى تۇردە ورىندالادى" دەپ. ءبىراق بۇل دا كەيدە مۇمكىن بولماي جاتادى"، - دەيدى مامان.
ول، شىندىعىندا، كەز كەلگەن جۇيەلى وزگەرىستەر، اسىرەسە بيۋروكراتيانى قىسقارتۋعا باعىتتالعان شارالار، وكىلەتتىكتەردى قايتا ءبولۋدى تالاپ ەتەتىنىن باسا ايتادى.
"البەتتە، بۇل جاعدايدان زيان شەگەتىن تاراپتار وزگەرىستەرگە كەدەرگى جاساۋعا بارىنشا تىرىسادى، ءتۇرلى سىلتاۋ ايتىپ، جوبالاردىڭ جۇزەگە اسۋىن كەشىكتىرۋى مۇمكىن. "ءبىز سينگاپۋر ەمەسپىز قوي" دەگەن جالتارۋ سوزدەن باستاپ، "وزگەرىس جاساۋعا ءالى ەرتە" دەگەندى دالەلدەپ، باسشىلىقتى سوعان سەندىرۋگە تىرىسادى. سونىمەن قاتار، تاعى ءبىر كوزگە كورىنە بەرمەيتىن كەدەرگى بار: — ەلدى "قاۋىپ-قاتەرلەردەن قورعاۋدى" ءوز مىندەتى سەكىلدى ساناپ العان شەنەۋنىكتەردىڭ ىس-ارەكەتى. مىسالى، مەملەكەتتىك ساتىپ الۋلار جۇيەسىن وڭتايلاندىرۋ كەرەك بولادى دەلىك، مۇندايدا الگى ديۆەرسانتتار ۇدەرە كوتەرىلىپ: "ويتسە ءبارىن تونايدى" دەگەن سىلتاۋمەن پروسەستەردى، كەرىسىنشە كۇردەلەندىرۋگە تىرىسادى. ال شىنتۋايتىندا، تابىستى دامىعان ەلدەردىڭ بارلىعى مەملەكەتتىك ساتىپ الۋلار سالاسىنا وڭتايلاندىرىلعان، قاراپايىم جۇيەلەردى ەنگىزگەننەن كەيىن عانا جەمقورلىقتى ازايتا الدى"، - دەيدى ول.
سونداي-اق مامان مەملەكەتتىك ساتىپ الۋلار زاڭناماسىن جەمقورلىقپەن كۇرەستىڭ باستى قۇرالىنا اينالدىرۋ قاتە، سەبەبى مۇندايدا بارلىعى جاۋاپكەرشىلىكتەن قاشا باستايدى نەمەسە بۇل مەملەكەتتىك قىزمەتكەرلەردىڭ كەز كەلگەن ارەكەتىن جەمقورلىق دەپ قاراستىرۋعا اكەلىپ سوعۋى مۇمكىن ەكەنىن ايتادى.
"شىندىعىندا، جەمقورلىقپەن كۇرەس ءۇشىن الدەقايدا ءتيىمدى قۇرالدار بار، اسىرەسە بۇل رەتتە جاپپاي دەكلاراسيالاۋ جۇيەسىن ەنگىزۋ ماڭىزدى ءرول اتقارادى. قالاي دەگەنمەن دە وسى باستامالار بيۋروكراتيانى جەڭەدى مە، الدە كەرىسىنشە بيۋروكراتيا ونىڭ ماڭىزىن جويادى ما، بۇل جاعى الداعى جارتى جىلدا بەلگىلى بولىپ قالادى"، دەپ ءسوزىن تۇيىندەيدى ولجاس قۇدايبەرگەنوۆ.
