Qazaqstan biylǵy jyldyń alǵashqy tórt aiynda "orta tabys tuzaǵynan" qutylyp, ekonomikalyq qurylymyn ártaraptandyrý baǵytynda mańyzdy qadamdar jasady. Bul týraly belgili qarjy sarapshysy Aibar Oljai málimdedi, dep habarlaidy Dalanews.kz.
Sarapshynyń aitýynsha, eger el ekonomikasy jyl sońyna deiin qazirgi serpindi qarqynyn saqtap qalsa, Qazaqstan munai baǵasy qulaǵan kezeńniń ózinde 6 paiyzdyq ósimge qol jetkizgen "fenomenaldy ekonomika" retinde tanylýy múmkin.
"2025 jyly qańtar-sáýir aralyǵynda Qazaqstan ekonomikasynyń ósýi 6% boldy. Eń myqty impýlsti kólik jáne tasymal salasy berip otyr. Osy sala 22,4 paiyzǵa ósken. Biz jańa temir joldaryn paidalanýǵa berý arqyly temirjoldaǵy júk tasymalyn jaqsy arttyrǵanbyz. Iaǵni kóbirek júk tasi bastadyq. Bul elimizdiń tranzittik logistikalyq biznesti jaqsy jolǵa qoiǵanyn baiqatady. Onymen qatar, tranzittik qubyr arqyly shikizat tasýdy da jaqsy damyttyq", — deidi Aibar Oljai.
Ekonomikalyq ósimge eleýli úles qosqan taǵy bir sala — qurylys. Bul sektorda naqty jumys kóleminiń indeksi 16,2 paiyzǵa artqan. Sarapshynyń sózinshe, qurylys salasynyń mýltiplikativtik áseri zor: ol otandyq qurylys materialdary óndirisine de serpin berýde.
"Qurylys toqtap turǵan joq. Kóptegen óńirlerde nysandar boi kóterip keledi. Qurylystyń mýltiáseri aýqymdy ekenin eskersek, osy salanyń damýy otandyq material óndirisine de qoldaý kórsetýde", - dep qosty ol.
Aibar Oljai munaiǵa táýeldilikten arylýdyń basty joly — óńdeý ónerkásibin damytý ekenin aitady.
"Óńdeý salasyndaǵy ósim 7,2% boldy. Onyń ishinde tamaq ónimderin óńdeý 12%-ǵa, temeki ónimderin shyǵarý 26,3%-ǵa, himiialyq ónimderdi óndirý 11,2%-ǵa jáne mashina jasaý 11,2%-ǵa artyp otyr", - deidi ol.
Sarapshy himiia salasyndaǵy ósimge álemdik alpaýyt Henkel kompaniiasynyń yqpal etkenin atap ótti. Kompaniia Reseidegi keńsesin Qazaqstanǵa kóshirip, Qonaev qalasyndaǵy zaýyttyń óndiristik qýatyn ulǵaitqan.
"Alpaýyttyń Qonaev qalasyndaǵy himiia zaýyty óndiristik qýatyn artyryp, qazirgi tańda Qazaqstanda shyǵarylǵan ónim búkil Ortalyq Aziia men Kavkazdy qamtyp otyr", - deidi ol.
Temeki óndirisinde de iri jobalar júzege asyrylýda. Almaty oblysynda Philip Morris kompaniiasy IQOS stikterin shyǵara bastasa, koreialyq KT&G kompaniiasy da osy óńirde zaýyt ashyp, tolyqqandy jumysqa kiristi.
"Oljas Bektenovtyń dáýirinde Qazaqstan munaiǵa degen basy bútin táýeldilikten aqyryndap qutyla bastaǵan siiaqty. Biz 30 jyl boiy «osyny nege istemeske» dep keldik. Endi munai ǵasyrynyń aiaqtalýyna degen daiyndyǵymyzdy jalǵastyra berý qajet. Jaqyn jyldary bizdiń ekonomikalyq qurylymda shiki munai úlesin 15 paiyz deńgeiine deiin túsire alsaq, shikizattyq baǵyttan óńdeýshi baǵytqa transformatsiiany sátti aiaqtadyq dep eseptei alamyz. Biraq ol úshin áli kóp sharýa tyndyrý qajet", — deidi Aibar Oljai.
