Erkin Baýlyqovtyń Saran qalasy ákimi qyzmetinen alynýy - jergilikti bilikke Úkimetten berilgen qatań eskertý, - dep habarlaidy Dalanews.kz.
Premer Oljas Bektenov qazannyń ortasynda, Sarandaǵy páterlerdiń jylytý maýsymyna daiyn emestigine kóńili tolmai, bul jaǵdai úshin jaýapty tulǵalardy jaýapkershilikke tartýǵa pármen bergen edi.
Bul onyń jergilikti atqarýshy bilikke baǵyttalǵan eleýli jáne qatqyl eskertýi edi.
Bektenovtyń aitýynsha, bul másele qala ákimi men oblys basshylyǵynyń baqylaýynyń nasharlyǵynan týyndaǵan.
Jylytý maýsymyna daiyndyq týraly jalǵan málimet bergen árbir jaýapty adam tekserilip, zań júzinde jaýapkershilikke tartylatyny aldyn ala aitylǵan bolatyn.
Dál osy jaǵdai jergilikti ákimder úshin jeke jaýapkershiliktiń qajettiligin aiqyndap otyr.
Keiin, 28 qazanda, Saran ákimine qatań eskertý jariialanǵan kezde, kópshilik Baýlyqovtyń tek sógispen qutylady dep paiymdaǵan edi.
Alaida, Úkimet basshysyna bul jaza jetkiliksiz bolyp kórindi.
QazTAG agenttiginiń dereginshe, Sol jaǵalaý kóptiń talabyna qulaq asyp, Baýlyqovty qyzmetinen bosatýdy durys dep sheshken. Ákimniń otstavkasy printsipti másele retinde qaralǵan.
Búgin Bektenov aitqan sózinde turyp, Úkimettiń aiqyn jáne qatań kózqarasyn kórsetti.
"Bul qadamnan keiin Astanadaǵy joǵarǵy laýazymdy tulǵalar aimaqtardaǵy ákimder úshin jaýap berýdi qoiyp, olardyń óz isterine jaýapty bolýyn talap etýde. Baýlyqovtyń qyzmetinen alynýy – jergilikti ákimderge naqty eskertý: ortalyq bilik endi burynǵydai jumsaq qaramaidy. Bul áreket, sóz joq, jergilikti ákimder úshin aýqymdy ózgeristerdiń bastamasy bolmaq", - deidi óz kezeginde sarapshylar.
Aita keteiik,búgin Saran ákimi Erkin Baýlyqov jylý berý maýsymynyń bastalýynda jibergen olqylyqtary úshin qyzmetinen bosatyldy. Qazan aiynyń ortasynda qurylysy 10 jylǵa sozylyp, biyl salynyp bitken jańa ortalyq qazandyqtaǵy aqaýlarǵa bailanysty Sarandaǵy 168 úi jylýsyz qalǵan edi.
"Qaraǵandy oblysy ákiminiń ókimimen Saran qalasynyń ákimi Erkin Baýlyqov qalada jylý berý maýsymynyń bastalýynda olqylyq jibergeni úshin atqaratyn qyzmetinen bosatyldy", - dep habarlady Qaraǵandy oblysynyń ákimdigi.
Ol bul qyzmetti bir jyldan astam ǵana ýaqyt atqardy.
Endi qala basshysy mindetin ýaqytsha osyǵan deiin Saran ákiminiń orynbasary bolǵan Maqsat Qaireshov atqaratyn boldy.
