Úkimettegi brifing kezinde jýrnalister qaýymy Úkimet múshelerine Memleket basshysynyń demalys aimaqtaryndaǵy máselege qatysty synyn taǵy bir márte eske saldy. Tilshilerdiń biri olardan elimizdegi demalys aimaqtarynda demalyp kórgen-kórmegenderin de surap kórdi, dep habarlaidy Dalanews.kz.
"Men bul salada problemalar baryn ári bizdegi kóptegen kýrorttyq demalys oryndarymyz álemdik standarttar túgili, qaýipsizdik, jailylyq boiynsha da bazalyq talaptarǵa sáikes kele bermeitinin joqqa shyǵarmaimyn. Bul rette Sizderdiń aitqandaryńyzben kelisemiz. Oiymyz bir. Bul baǵytta jumystar júrgiziletin bolady. Ókinishke qarai, bizde mynandai ádet bar: árqashan berilgen esepter ádemi bolady, barlyǵy jaǵajai maýsymyna daiyn degendei, al teksere kelgende, jaǵdai basqasha bolyp shyǵyp jatady. Bul arada kemshilikter baryn, sonyń ishinde Úkimet tarapynan da bolǵanyn moiyndaimyz", - dedi Oljas Bektenov.
Alaida ol sońǵy ret óziniń qaida demalǵanyn aita almai, birshama abyrjydy.
"Naqty qai jer ekeni esimde joq, 2021 jyl bolýy kerek, Býrabaida nemese Alakólde. Osydan keiin mende demalys degen atymen bolǵan joq, eshqaida barmadym. Munda Astanada eń jaqyny – Býrabai, biraq sonyń ózine barýǵa ýaqyt tabyla bermeidi. Ótken jyly Alakólde jumys sapary aiasynda boldym, sýǵa túspedim, biraq jaǵdaidy bajailadyq... Qazaqstandyqtar el ishinde demalýy úshin barynsha jumys isteitin bolamyz. Bul ekonomika úshin de áldeqaida tiimdi, iaǵni týristerdi qabyldaityn azamattarymyzǵa aqsha túsetin bolady. Sondyqtan biz jumys isteitin bolamyz", - dep sendirdi ol.
Onyń orynbasarlary da uzaq ýaqyt boiy tolyqqandy demalysqa shyqpaǵan bolyp shyqty.
"Men de ókinishke qarai, uzaq ýaqyt boldy, demalysta bolǵan joqpyn. Biraq ózimniń kishi Otanym – Baianaýyl, Pavlodarda bolǵandy jaqsy kóremin. Bul meniń súiikti jerlerim", - dep moiyndady Roman Skliar.
Sońǵy eki jylda Serik Jumanǵarin de demalmapty.
"Sońǵy ret Jańa jyl qarsańynda Aqkólde boldym. Aitqandai, óte jaqsy demalys oryny", - dedi ol.
Ermek Kósherbaev pen Qanat Bozymbaev ótken jyly az da bolsa demala alypty.
"Ótken jyly jeti kúndik demalysym boldy. Sonyń tórt kúnin men Eýropada ótkizdim, al qalǵan kúnderi Buqtyrmada otbasymmen demaldym", - dep atap ótti Ermek Kósherbaev.
Qanat Bozymbaev ótken jyly sý tasqyny saldarynan demalysqa shyqpapty, biraq demalys kúnderi Aqtaýdaǵy "Jyly jaǵajai" aýdanyna jáne Alakólge barǵan eken.
