Oljas Bektenov óńir ákimderine jaz mezgili ystyq ári qurǵaq bolady degen boljamdardy eskere otyryp, órt qaýpi joǵary kezeńge daiyndyq jumystaryn qamtamasyz etýdi tapsyrdy, dep habarlaidy Dalanews.kz.
Úkimet otyrysy barysynda QR Premer-ministri Oljas Bektenov Qazgidromettiń jaz mezgili ystyq ári qurǵaq bolady degen boljamyn eskere otyryp, órt qaýpi joǵary kezeńdegi barlyq qyzmet shuǵyl qimyldap, úilesimdi áreket etýi mańyzdy ekenin basa aitty. Daiyndyq sharalary jetkiliksiz bolǵan aimaqtarǵa erekshe nazar aýdaryldy.
«Tekseris kórsetkendei, Tabiǵi órtterdiń aldyn alý jáne joiý jónindegi is-sharalar jospary barlyq óńirde birdei tiisti deńgeide iske asyrylyp otyrǵan joq. Jambyl, Qostanai, Túrkistan, Aqtóbe, Qaraǵandy, Abai, Jetisý jáne Ulytaý oblystaryndaǵy eldi mekenderdiń ainalasynan mineraldy beldeý jasaý jumystary bastalmaǵan. Dalaly jerlerde, ormanda órt shyǵatyn bolsa, bul aýyldarǵa tikelei qaýip tónedi.
Batys Qazaqstan, Qostanai, Qaraǵandy, Ulytaý oblystarynda eldi mekenderdiń aýmaǵyn qýraǵan shópter men qoqystardan tazartý jumystary áli kúnge deiin júrgizilmegen. Odan bólek, Aqtóbe, Pavlodar, Qyzylorda, Atyraý, Batys Qazaqstan, Qostanai, Túrkistan, Soltústik Qazaqstan jáne Jambyl oblystarynyń orman mekemeleri órt qaýpi joǵary kezeńge daiyn emes.Osyǵan bailanysty óńir ákimderine biylǵy maýsymǵa daiyndyq jumystaryn kúsheitýdi jáne bul máseleni tikelei baqylaýǵa alýdy tapsyramyn», — dep atap ótti Oljas Bektenov.
Sonymen qatar, ákimdikterge órt sóndirý kólikterine kerekti sý kózderin daiyndaý jáne qajetti otyn qoryn qamtamasyz etý tapsyryldy.
«Ákimdikter eldi mekenderde órt sóndirý beketteri men erikti órtke qarsy qurylymdardy uiymdastyrý jumysyn jalǵastyrsyn. Sondai-aq óńirlerde janar-jaǵarmai materialdarynyń qajetti qoryn qamtamasyz etý kerek. Órt sóndirý kólikteri men tikushaqtarǵa qajetti sý kózderin daiyndaý qajet»,dep atap ótti Oljas Bektenov. Atalǵan tapsyrmalardyń oryndalýyn biylǵy 10 mamyrǵa deiin qamtamasyz etý qajet.
Ishki ister ministrligine órt qaýpi joǵary kezeńde orman alqaptarynda demalýǵa tyiym salý sharalaryn qabyldaý tapsyryldy. Premer-ministr reidter men kúzet kestesin jasaýdy tapsyrdy. Sonymen qatar órt qaýipsizdigi talaptaryn buzǵandardyń barlyǵy jaýapkershilikke tartylýy tiis.
Halyqqa ór qaýipsizdigi talaptaryn saqtaý týraly aqparat berý máselesine erekshe nazar aýdaryldy.
«Tótenshe jaǵdailar, Ekologiia jáne tabiǵi resýrstar, Mádeniet jáne aqparat ministrlikteri men ákimdikter el arasynda órt qaýipsizdigi talaptaryn saqtaý týraly túsindirý jumystaryn jandandyrýy kerek»,dep atap ótti Oljas Bektenov.
