Qazaqstanda turǵyn úi saiasatyn jetildirý jáne kommertsiialyq ipotekanyń qoljetimdiligin arttyrý máselesi Úkimet otyrysynda qaraldy. Premer-ministr Oljas Bektenov bankter arqyly beriletin ipotekalyq nesielerdiń kólemin kóbeitý qajettigin aitty. Onyń pikirinshe, kommertsiialyq ipotekany damytý memlekettik turǵyn úi baǵdarlamalaryna túsetin júktemeni azaitýǵa múmkindik beredi, dep habarlaidy Dalanews.kz.
Úkimet basshysy Ónerkásip jáne qurylys ministrligine Ulttyq bankpen jáne basqa da jaýapty mekemelermen birlesip, ekinshi deńgeili bankterdiń ipotekalyq ónimderin damytýǵa baǵyttalǵan jańa tásilder ázirleýdi tapsyrdy. Al Otbasy bank óz jumysynda eń aldymen áleýmettik turǵydan álsiz toptarǵa qoldaý kórsetýge basymdyq berýi tiis ekenin atap ótti.
Sonymen qatar premer-ministr óńir ákimdikteri men Ónerkásip jáne qurylys ministrligine biylǵy jylǵa josparlanǵan turǵyn úi kólemin tolyq iske asyrýdy mindettedi. Jańa turǵyn aýdandardy damytý kezinde tek úiler salýmen shektelmei, mektep, balabaqsha, meditsinalyq mekemeler siiaqty áleýmettik nysandardy da turǵyndarǵa jaqyn ornalastyrý mańyzdy ekeni aityldy.
Qurylys qarqyny ásirese Astana men Almaty qalalarynda joǵary. Osyǵan bailanysty Úkimet Ónerkásip ministrligine, «Báiterek» holdingine jáne jergilikti ákimdikterge turǵyndardy qoljetimdi baspanamen qamtýǵa arnalǵan óńirlik baǵdarlamalardy belsendi iske asyrýdy tapsyrdy.
Budan bólek, birqatar naqty mindetter belgilendi:
- Ónerkásip jáne qurylys ministrligi 1 shildege deiin jańa Qurylys kodeksi aiasyndaǵy normativtik aktilerdi jańartyp, qabyldaýy tiis;
- Ónerkásip ministrligi men «Báiterek» holdingi qurylys materialdary men jabdyqtaryn óndirýge baǵyttalǵan 38 jobany ýaqytynda iske qosýdy qamtamasyz etýi kerek;
- Ónerkásip jáne qurylys ministrligi men jasandy intellekt salasyna jaýapty vedomstvo shilde aiynyń sońyna deiin jobalardy saraptaýǵa arnalǵan jasandy intellekt modýlderin pilottyq rejimde engizýi qajet.
Osylaisha, Úkimet turǵyn úi qurylysynyń qarqynyn arttyrýmen qatar, ipotekalyq qarjylandyrý tetikterin keńeitý arqyly halyqtyń baspanaǵa qoljetimdiligin jaqsartýdy kózdep otyr.
