قازاقستاندا تۇرعىن ءۇي ساياساتىن جەتىلدىرۋ جانە كوممەرسيالىق يپوتەكانىڭ قولجەتىمدىلىگىن ارتتىرۋ ماسەلەسى ۇكىمەت وتىرىسىندا قارالدى. پرەمەر-مينيستر ولجاس بەكتەنوۆ بانكتەر ارقىلى بەرىلەتىن يپوتەكالىق نەسيەلەردىڭ كولەمىن كوبەيتۋ قاجەتتىگىن ايتتى. ونىڭ پىكىرىنشە، كوممەرسيالىق يپوتەكانى دامىتۋ مەملەكەتتىك تۇرعىن ءۇي باعدارلامالارىنا تۇسەتىن جۇكتەمەنى ازايتۋعا مۇمكىندىك بەرەدى، دەپ حابارلايدى Dalanews.kz.
ۇكىمەت باسشىسى ونەركاسىپ جانە قۇرىلىس مينيسترلىگىنە ۇلتتىق بانكپەن جانە باسقا دا جاۋاپتى مەكەمەلەرمەن بىرلەسىپ، ەكىنشى دەڭگەيلى بانكتەردىڭ يپوتەكالىق ونىمدەرىن دامىتۋعا باعىتتالعان جاڭا تاسىلدەر ازىرلەۋدى تاپسىردى. ال وتباسى بانك ءوز جۇمىسىندا ەڭ الدىمەن الەۋمەتتىك تۇرعىدان ءالسىز توپتارعا قولداۋ كورسەتۋگە باسىمدىق بەرۋى ءتيىس ەكەنىن اتاپ ءوتتى.
سونىمەن قاتار پرەمەر-مينيستر ءوڭىر اكىمدىكتەرى مەن ونەركاسىپ جانە قۇرىلىس مينيسترلىگىنە بيىلعى جىلعا جوسپارلانعان تۇرعىن ءۇي كولەمىن تولىق ىسكە اسىرۋدى مىندەتتەدى. جاڭا تۇرعىن اۋدانداردى دامىتۋ كەزىندە تەك ۇيلەر سالۋمەن شەكتەلمەي، مەكتەپ، بالاباقشا، مەديسينالىق مەكەمەلەر سياقتى الەۋمەتتىك نىسانداردى دا تۇرعىندارعا جاقىن ورنالاستىرۋ ماڭىزدى ەكەنى ايتىلدى.
قۇرىلىس قارقىنى اسىرەسە استانا مەن الماتى قالالارىندا جوعارى. وسىعان بايلانىستى ۇكىمەت ونەركاسىپ مينيسترلىگىنە، «بايتەرەك» حولدينگىنە جانە جەرگىلىكتى اكىمدىكتەرگە تۇرعىنداردى قولجەتىمدى باسپانامەن قامتۋعا ارنالعان وڭىرلىك باعدارلامالاردى بەلسەندى ىسكە اسىرۋدى تاپسىردى.
بۇدان بولەك، ءبىرقاتار ناقتى مىندەتتەر بەلگىلەندى:
- ونەركاسىپ جانە قۇرىلىس مينيسترلىگى 1 شىلدەگە دەيىن جاڭا قۇرىلىس كودەكسى اياسىنداعى نورماتيۆتىك اكتىلەردى جاڭارتىپ، قابىلداۋى ءتيىس؛
- ونەركاسىپ مينيسترلىگى مەن «بايتەرەك» حولدينگى قۇرىلىس ماتەريالدارى مەن جابدىقتارىن وندىرۋگە باعىتتالعان 38 جوبانى ۋاقىتىندا ىسكە قوسۋدى قامتاماسىز ەتۋى كەرەك؛
- ونەركاسىپ جانە قۇرىلىس مينيسترلىگى مەن جاساندى ينتەللەكت سالاسىنا جاۋاپتى ۆەدومستۆو شىلدە ايىنىڭ سوڭىنا دەيىن جوبالاردى ساراپتاۋعا ارنالعان جاساندى ينتەللەكت مودۋلدەرىن پيلوتتىق رەجيمدە ەنگىزۋى قاجەت.
وسىلايشا، ۇكىمەت تۇرعىن ءۇي قۇرىلىسىنىڭ قارقىنىن ارتتىرۋمەن قاتار، يپوتەكالىق قارجىلاندىرۋ تەتىكتەرىن كەڭەيتۋ ارقىلى حالىقتىڭ باسپاناعا قولجەتىمدىلىگىن جاقسارتۋدى كوزدەپ وتىر.
