Qazaqstandyq saiasattanýshylar Prezident Ákimshiliginiń basshysy Oljas Bektenovtiń úkimet basshysy laýazymyna usynylýyna qatysty pikir bildirdi, dep habarlaidy Dalanews.kz.
Saiasi sarapshy Ǵaziz Ábishev Oljas Bektenovtiń bul laýazymǵa “sybailas jemqorlyqqa qarsy kúresti qatańdatý”maqsatynda usynylyp otyrǵanyn alǵa tartty.
“Oljas myrzanyń Úkimetke kelýde ózindik missiiasy bar: Bektenov Toqaevtyń saiasatyn tejep otyrǵan jemqorlarǵa qarsy aiaýsyz kúres júrgizedi ári eski Qazaqstannyń syrtqa tasyǵan aktivin keri qaitarýda tabandylyq tanytady", - dep jazdy Ábishev óziniń Telegram-arnasynda.
Ábishev Bektenovtyń Astana qalasy men Aqmola oblysynyń ákimdikterinde tájiribesi bar ekenin de atap ótti.
“Onyń basty ereksheligi sybailas jemqorlyqqa qarsy qyzmette jumys isteýi boldy. Bul qyzmetinde sybailas jemqorlyq shemalaryn áshkerelep, olarmen kúresý boiynsha aýqymdy jumys júrgizdi”, - dep jazady Ǵaziz Ábishev.
Ótken jyly prezident Toqaev ony óz Ákimshiliginiń basshysy etip taǵaiyndady. Osy tusta Bektenov Ákimshilikti reformalaýdy, protsesterdi ońtailandyrýdy jáne biýrokratiiany aitarlyqtai azaitýdy tyńǵylyqty túrde qolǵa aldy dep qosty saiasi baqylaýshy. Sonymen birge Oljas Bektenov zańsyz alynǵan aktivterdi qaitarý protsesin belsendi túrde júrgizdi.
Aitý kerek, Bektenov úlken saiasatqa Toqaevtyń kezinde keldi. Sondyqtan ol “Eski Qazaqstan” ókiline jatpaidy. Saiasattanýshy pikirinshe, Toqaev onyń kásibi biliktiligi men jeke qasietterine basymdyq bergen.
"El ekonomikasyna jańa serpin beretin ári naqty nátijege jetkizetin sheshýshi menedjer qajet. Osy tusta antikorda jiǵan tájiribesi Bektenovke biýrokratiialyq jáne qarjylyq resýrstardy qajet jerlerge baǵyttap, durys joldy tez tabýǵa kómektesedi. Bektenov sybailas jemqorlyq pen kúmán keltiretin saiasi bailanystar turǵysynan 100 ret tekserildi”, - dep qosty Ábishev.
Siasattanýshy Daniiar Áshimbaev ta Oljas Bektenovtiń myqty tulǵa ekenin atap ótti.
“Men tipti ony qatal dep aitar edim. Biraq oǵan Ákimshilik basshysy retinde úirenip qaldy. Sondyqtan kópshiligi mundai ózgeriske daiyn bolmady”, - dep jazdy ol.
Al saiasattanýshy Orazǵali Selteev Oljas Bektenov tulpar bolyp top jaryp shyqqanyn jetkizdi.
“Onyń esimi premer-ministr laýazymyna úmitkerler arasynda qoǵamdyq talqyǵa túsken joq. Óitkeni bul laýazym úshin aqparattyq kúreste boi kórsetpedi. Sol sebepti el úshin kútpegen jaǵdai boldy”, - deidi saiasattanýshy.
Sonymen qatar ol osy laýazymǵa sai eń negizgi qasietterge ie ekenin de atap ótti.
"Memleket basshysy aldyn ala eshkimmen aqyldaspasa kerek. Bektenov qazirgi ýaqytta ekonomikany monopoliiasyzdandyrý jáne aktivterdi qaitarý protsesterin tereńdetý úshin sheshýshi reformator ári qatal basshy qasietterine tolyǵymen sáikes keledi. Sondai-aq syr bergen aimaqtardaǵy baqylaýdy qamtamasyz ete alady”, - dep jazady Selteev óziniń Telegram-arnasynda.
Aita keteiik, zańǵa sáikes, premer-ministr kandidatýrasyn sońǵy sailaýda eń kóp daýys jinaǵan partiia usynyp otyr. El Prezidenti usynylǵan kandidatýrany Májilistegi partiia fraktsiialarynyń jetekshilerimen talqylaidy.
