Qazaqstan Respýblikasynyń Premer-ministri Oljas Bektenov Sholpan-Ata qalasynda (Qyrǵyzstan) Qyrǵyz Respýblikasynyń Prezidenti Sadyr Japarovtyń Eýraziialyq úkimetaralyq keńes delegatsiialary basshylarymen ujymdyq kezdesýine jáne keńeitilgen EÚAK otyrysyna qatysty, dep habarlaidy Dalanews.kz.
Kezdesý barysynda EAEO elderiniń ekonomikalyq áleýetin nyǵaitý, halyqtyń ómir súrý deńgeiin jaqsartý, ózara saýdany damytý, Odaq naryǵyndaǵy kedergilerdi joiýǵa jáne basqa da máselelerge nazar aýdaryldy.
EÚAK keńeitilgen quramdaǵy otyrysyna Belarýs Respýblikasynyń Premer-ministri Aleksandr Týrchin, Qyrǵyzstan Ministrler kabinetiniń tóraǵasy – Qyrǵyz Respýblikasy Prezidenti Ákimshiliginiń basshysy Adylbek Qasymaliev, Resei Federatsiiasy Úkimetiniń tóraǵasy Mihail Mishýstin, Armeniia Respýblikasynyń vitse-premeri Mger Grigorian, baqylaýshy elderden – Iran Respýblikasynyń birinshi vitse-prezidenti Muhammed-Reza Aref, Ózbekstan Respýblikasynyń Premer-ministri Abdýlla Aripov, Kýba Respýblikasynyń Premer-ministri Manýel Marrero Krýz (beinekonferentsiia arqyly), sondai-aq Eýraziialyq ekonomikalyq komissiia alqasynyń tóraǵasy Baqytjan Saǵyntaev qatysty.
Saýda-ekonomikalyq, kólik-logistikalyq, munai-gaz jáne tsifrlyq salalar, sondai-aq kedendik jáne birja qyzmeti, meditsina men farmatsevtika, eńbek naryǵy jáne basqa da salalardaǵy ózara is-qimyl qaraldy.
Qazaqstan Premer-ministri óz sózinde yntymaqtastyqty damytýdyń basym baǵyttaryn atap ótti. Ózara saýdany damytýǵa jáne syrtqy ekonomikalyq bailanystardy arttyrý jónindegi birlesken sharalarǵa nazar aýdaryldy. Jetkizýshilerdiń memlekettik satyp alýlarǵa teń qoljetimdiligin qamtamasyz etý máselelerine de basa nazar aýdaryldy.
"Keibir jaǵdailarda EAEO-ǵa múshe memleketterdiń territoriiasy boiynsha kedergisiz tranzit qamtamasyz etilmei jatady", – dedi bul rette Bektenov.
Sondai-aq ol memlekettik satyp alýlar týraly sóz bolǵanda, odaq elderi ortaq tártipten ainalyp, ózge elderdiń tasymaldaýshylary úshin oryndalýy qiyn talaptardy alǵa tartyp shyǵa keletinin de aitty. Mundai jaǵdai 2020 jyly memlekettik satyp alýlarda ulttyq rejimdi qamtamasyz etýge arnalǵan tártiptiń qabyldanǵanyna qaramastan oryn alýda.
"Áriptester, bul odaqty qura otyryp, biz taýarlar, qyzmetter men kapitaldardyń erkin qozǵalysyn qamtamasyz etýdi maqsat etken edik qoi", – dep naqtylady Bektenov.
Sondai-aq Úkimet basshysy osyndai kedergiler men shekteýlerdi joiý jónindegi jumystardy jalǵastyrýdy usyndy.
Kólik jáne logistika salasynda óńirdiń barlyq memlekettiń múddelerin eskere otyryp, balamaly baǵyttar qurýdyń ózektiligi aiqyndaldy. Búgingi tańda keleshegi zor kólik baǵyttarynyń biri – ótkizý qabileti 10 mln tonnaǵa deiin júkti quraityn "Týrgýndi-Gerat" temirjoly jobasy.
Saýda aǵyndarynyń turaqty ósýin jáne ártaraptandyrylýyn qamtamasyz etý úshin EAEO-nyń úshinshi elder men uiymdar arasyndaǵy yntymaqtastyǵyn keńeitý mańyzdy. Qazaqstan ár túrli formattaǵy seriktestermen ózara is-qimyldy tereńdetýdi jaqtaidy.
Jiyn barysynda qatysýshylar gaz, munai, munai ónimderiniń ortaq naryqtaryn, sondai-aq taýarlardyń birja naryǵyn qalyptastyrýǵa qatysty baiandamalardy tyńdady. Birjalyq saýda-sattyqty damytý baǵdarlamasy bekitilip, dárilik zattar men meditsinalyq buiymdardyń ortaq naryǵyn damytý tujyrymdamasy maquldandy. Bul qujattardy iske asyrý EAEO sheńberinde áriptes elderdiń sapaly ári qaýipsiz ónimin qamtamasyz etýge baǵyttalǵan.
Qatysýshylar klimattyq kún tártibin iske asyrý, kólik dálizderin tsifrlandyrý, eńbek naryǵyndaǵy biliktilik talaptarynyń jaqyndasýy jáne basqa da máselelerge qatysty pikir almasty. Kezdesý qorytyndysy boiynsha 10 qujatqa qol qoiyldy.
EÚAK-tyń kelesi otyrysy biylǵy 29-30 qyrkúiekte Minsk qalasynda (Belarýs) ótedi.
Buǵan deiin Premer-ministrdiń birinshi orynbasary Roman Skliardyń tóraǵalyǵymen Qazaqstannyń iri ónerkásiptik kásiporyndarynyń qyzmetine jasandy intellekt (JI) tehnologiialaryn engizý máseleleri boiynsha jiyn ótkeni habarlanǵan.
