Qazaqstanda tsifrlyq aktivter indýstriiasyn damytý úshin tokenizatsiia, tsifrlyq teńge, maining jáne halyqaralyq tsifrlyq esep aiyrysý júielerin qatar damytý qajet. Bul týraly Úkimet otyrysynda Premer-ministr Oljas Bektenov málimdedi, dep habarlaidy dalanews.kz.
Bektenov tsifrlyq aktivter salasy Qazaqstan ekonomikasy úshin jańa baǵyt ekenin atap ótti. Onyń aitýynsha, endi negizgi mindet – osy salada tolyqqandy ekojúie qalyptastyryp, ony investitsiia tartý men qarjy sektorynyń básekege qabilettiligin arttyrýǵa paidalaný.
Premer-ministr naqty aktivterdi tokenizatsiialaýǵa erekshe nazar aýdarýdy tapsyrdy. Onyń sózinshe, iri infraqurylymdyq jobalar, jyljymaityn múlik, shikizat jáne basqa aktivter tsifrlyq úlesterge bólinip, qosymsha investitsiia tartý quralyna ainala alady.
«Salynyp jatqan kez kelgen ǵimaratty nemese jobany investorlar qarjylandyra alatyn tsifrlyq úlesterge bólýge bolady. Mundai jobaǵa kez kelgen adam aktsioner retinde qatysa alady», – dedi Bektenov.
Ol Ulttyq bankke investitsiia tartý úshin tokenizatsiiaǵa basym tártippen shyǵarylatyn aktivterdiń naqty tizbesin anyqtaýdy tapsyrdy. Bul rette tsifrlyq mámilelerdiń qaýipsizdigine kepildik beretin tiimdi retteý tetigi qajet ekenin atap ótti.
Premer-ministr tsifrlyq aktivter naryǵynyń ósýimen birge alaiaqtyqtyń jańa túrleri paida bolyp jatqanyn da aitty. Onyń málimetinshe, osy aida Qarjylyq monitoring agenttigi kriptovaliýta túrinde shaǵyn nesie berý degen jeleýmen júrgizilgen zańsyz árekettiń jolyn kesken.
«Ýákiletti organdar aldaǵy ýaqytta da azamattardy tsifrlyq ortada qorǵaýdy qamtamasyz etýi qajet», – dedi ol.
Bektenov Jasandy intellekt jáne tsifrlyq damý ministrligine Ulttyq bankpen birlesip, kiberqaýipsizdikti kúsheitý jáne tsifrlyq aktivter salasyndaǵy zańnamany jetildirý jumystaryn júrgizýdi tapsyrdy.
Premer-ministr tsifrlyq teńgeni engizýdi de mańyzdy baǵyt retinde atady. Onyń aitýynsha, tsifrlyq teńge kriptovaliýtadan erekshelenedi, óitkeni ony Ulttyq bank shyǵarady jáne ol zańdy tólem quraly bolyp sanalady.
Tsifrlyq teńgeni memlekettik shyǵystardyń tiimdiligin arttyrýǵa, memlekettik satyp alýlar men korporativtik operatsiialardaǵy esep aiyrysýdy avtomattandyrýǵa paidalaný josparlanyp otyr. Qarjy ministrligi Ulttyq bankpen birlesip, tsifrlyq teńgeni qoldaný aiasyn keńeitý boiynsha sharalardy ázirleýi tiis.
Budan bólek, Bektenov kriptovaliýtalardyń ónerkásiptik mainingine toqtaldy. Halyqaralyq zertteýlerge sáikes, Qazaqstan 2025 jyldyń qorytyndysy boiynsha jahandyq bitkoin mainingine qatysý úlesi boiynsha álemniń jetekshi on eliniń qataryna kirgen.
Premer-ministr mainingtik qýatty jai ǵana arttyrý jetkiliksiz ekenin aitty. Memlekettik saiasat energiia tutynýyn baqylaýǵa, salyq salýdyń ashyqtyǵyna jáne maining indýstriiasyn álemdik tsifrlyq ekonomikaǵa integratsiialaýǵa baǵyttalýy kerek.
Ol Jasandy intellekt jáne tsifrlyq damý ministrligine Blockchain jáne maining qaýymdastyǵymen jáne basqa memlekettik organdarmen birlesip, salany damytý boiynsha qosymsha sharalar ázirleýdi tapsyrdy.
«Birjany, tsifrlyq quraldardy, tokenizatsiiany, aktivterdi saqtaý tetikterin jáne tólem sheshimderin qamtityn tolyqqandy tsifrlyq maining indýstriiasyn qalyptastyrý qajet», – dedi Bektenov.
Energetika ministrligine Jasandy intellekt jáne tsifrlyq damý ministrligimen birge maining ortalyqtarynyń jumysyn qamtamasyz etý úshin gaz jáne kómir generatsiiasyn paidalaný tetigin pysyqtaý tapsyryldy.
Bektenov sondai-aq tsifrlyq aktivter naryǵynda básekege qabiletti jaǵdai qalyptastyrýdy tapsyrdy. Onyń aitýynsha, qabyldanatyn sheshimder kapitaldy Qazaqstan ekonomikasyna qaitarýǵa, ishki naryqty damytýǵa jáne halyqaralyq qatysýshylardy tartýǵa yqpal etýi kerek.
Sonymen birge Tsifrlyq aktivter jáne tólem júieleri komitetin qurý jumysyn jedeldetý tapsyryldy.
Premer-ministr tsifrlyq aktivter indýstriiasyn damytý tek qarjylyq retteýmen shektelmeitinin atap ótti. Onyń aitýynsha, bul salaǵa baǵdarlamalyq sheshimder, zamanaýi tehnologiialar jáne joǵary bilikti mamandar qajet.
«Qazaqstan tsifrlyq aktivter ainalymynyń alańy ǵana emes, sonymen qatar osy sala úshin óz ónimderin ázirlep, joǵary bilikti mamandaryn daiarlaityn el bolýy kerek», – dedi Bektenov.
Sonymen qatar Ulttyq bankke tsifrlyq qarjy quraldaryn halyqaralyq esep aiyrysýda paidalaný múmkindigin pysyqtaý tapsyryldy. Bektenov mundai quraldar esep aiyrysý jyldamdyǵyn arttyryp, qazaqstandyq biznestiń múmkindikterin keńeite alatynyn aitty.
Ulttyq bank buǵan deiin tsifrlyq aktivter naryǵyn damytý jónindegi birlesken is-qimyl josparyn ázirlegen. Premer-ministr osy jospardaǵy sharalardyń ýaqtyly ári sapaly oryndalýyn qamtamasyz etýdi tapsyrdy.
«Naqty nátijelerge qol jetkizý úshin árbir basshynyń derbes jaýapkershiligi kózdelgen. Osyǵan basa nazar aýdaramyn», – dedi Oljas Bektenov.
