Bek Air-diń burynǵy basshysy 2019 jylǵy áýe apaty jaily sotta aitty, dep habarlaidy Dalanews.kz.
Aita keteiik, bul atyshýly is Almatynyń Túrksib aýdandyq sotynda «Áýe kemesin paidalaný nemese qozǵalys qaýipsizdigi erejelerin buzý, abaisyzda eki nemese odan da kóp adamnyń qaza bolýyna ákep soqtyrý» baby boiynsha qaralyp jatyr. 2019 jyly Fokker 100 ushaǵy áýege kóterile almai, qatty soǵylyp, ushý-qoný jolaǵynan shyǵyp ketken. Keiin ol salynyp jatqan turǵyn úige soǵylǵan.
Apat saldarynan 12 adam qaza tapty, taǵy 69 adam jaraqat aldy.
Orda.kz málimetinshe, sotqa qorǵaný quqyǵymen kýáger retinde shaqyrylǵan Nurlan Jumasultanov ózin kompaniianyń basshysy retinde moiyndaýdan bas tartty. Al tergeý kezinde ol muny kerisinshe rastaǵan edi. Jábirlenýshi taraptyń ókilderiniń biri áriptesterin «Jumasultanovty qorǵap otyr, aiyptamai otyr» dep sókti.
Jabylyp qalǵan áýe kompaniiasynyń burynǵy basshysynyń mundai minezin túsinýge bolady: sebebi apatqa sep bolǵan jańa mán-jailar ashylyp jatyr.
Bul Bek Air-diń keibir basshylarynyń aqyry jaýapqa tartylýy múmkin ekenin bildiredi. Ázirge apat úshin kiná marqum bolǵan ushaq komandiri Marat Muratbaev pen ekinshi pilot Mirjan Moldaqulovqa artyldy.
Eske salaiyq, buǵan deiin Qazaqstanda 2019 jyldyń sońynda bolǵan Bek Air áýe apatyna qatysty tergeý qaita júrgiziletinin habarlaǵan edik. Bul týraly kólik ministri Nurlan Saýranbaev málimdedi.
Ministrdiń aitýynsha, atalǵan ushaq apatyna qatysty tergeý jumystary qaita jandanbaq.
2024 jyldyń jeltoqsanynda eks-ministr Marat Qarabaev ta bul is boiynsha tergeý qaita bastalýy múmkin ekenin aitqan edi.
Bek Air áýe apaty 2019 jylǵy 27 jeltoqsanda bolǵan. Almatydan Nur-Sultanǵa (qazirgi Astana) baǵyt alǵan ushaq áýege kóterilgennen keiin birden biiktigin joǵaltyp, áýejai mańyndaǵy qorshaýdy buzyp ótip, eki qabatty kottedjge soǵylǵan. Ushaqta 93 jolaýshy men 5 ekipaj múshesi bolǵan. Apat saldarynan 12 adam qaza tapqan.
